Fota: BiełTA
«Ja baču, ciapier nahniatajecca situacyja. Asabliva paśla hetych maštabnych pieramoŭ (majučyja adbycca 19 śniežnia pieramovy kiraŭnikoŭ Biełarusi i Rasii ŭ Minsku — NN) usie buduć kazać, što ŭsio: užo ŭ Biełarusi niama ŭłady, tut užo rasijanie pieššu chodziać i kirujuć krainaj. Jašče raz chaču padkreślić hetuju asablivaść: nichto, akramia nas, Biełaruśsiu nie kiruje. Heta našy funkcyi pa Kanstytucyi, i maja ŭ tym liku. My realizoŭvajem hetyja funkcyi», — zajaviŭ jon.
«Šmat chto ŭ nas tut pačynaje šaptacca, kali nie atrymlivajecca damovicca, što Rasija stavić nieprymalnyja dla nas umovy, źviazanyja z našaj niezaležnaściu i suvierenitetam. Absalutna ščyra kažu: pry ŭsich składanaściach, kali Rasijskaja Fiederacyja — kiraŭnictva — choča budavać adnosiny ź niezaležnaj suvierennaj dziaržavaj Biełaruś, kali Rasija ŭsprymaje nas jak suvierennuju i niezaležnuju dziaržavu (ale vielmi blizkuju, vielmi nadziejnuju, dzie ŭsio ruskaje — ad movy da rasijskich tradycyj — śviata ŭšanoŭvajecca), my hatovyja vybudoŭvać adnosiny. Ale my pavinny zaŭsiody zychodzić z taho, što my — dziaržava suvierennaja i niezaležnaja», — padkreśliŭ Alaksandr Łukašenka.
Jon paŭtaryŭ svajo daŭniaje śćviardžeńnie, što Biełaruś u svoj čas była hatovaja i dalej žyć i pracavać u ramkach Savieckaha Sajuza, ale, tym nie mienš, zdabytyja suvierenitet i niezaležnaść nieparušnyja: «My hatovyja byli ŭ adnoj dziaržavie žyć, słužyć, pracavać. Imia jaje — Saviecki Sajuz. Usio było na maich vačach. Ale nie my jaho razburyli. I adkul pajšli tendencyi da razbureńnia hetaj dziaržavy, i pra pryčyny hetaha razbureńnia my šmat viedajem. Tamu nam, chaj niečakana, dastalisia hetyja suvierenitet i niezaležnaść. My śviata pavinny zachoŭvać. Tamu što hetaha choča biełaruski narod».
Taksama Łukašenka zajaviŭ pra važnaść zachavańnia toj zaležnaści ad Rasii, u jakoj Biełaruś isnuje ciapier.
«Ale my nikoli nie budziem vorahami Rasii. I nikoli kosa ŭ bok Rasii hladzieć nie budziem. Heta samaja blizkaja nam dziaržava, samyja blizkija nam narody. Dumaju,
pakul my z vami la ŭłady, my budziem prytrymlivacca takoj tendencyi. Kali b było inakš, było b, jak va Ukrainie, — miarkuje Alaksandr Łukašenka. — Usie heta razumiejuć, ale nie ŭsie mohuć pra heta kazać».
«Tyja, chto źbieh, im treba zarablać hrošy na žyćcio. Hrošy chtości daŭ, skazaŭ, jak skazać, — jany kažuć. Tamu suvierenitet i niezaležnaść nieparušnyja. I ŭsiakija razmovy ŭ nas ci tam (za miažoj) — inakš heta značyć zdrada intaresam biełaruskaha naroda», — zajaviŭ Łukašenka.
«Tak, my z Rasijaj jak suvierennaja i niezaležnaja dziaržava. Ja heta kažu spakojna, viedajučy pazicyju prezidenta Rasii. My navat hetaje pytańnie zaraz nie abmiarkoŭvajem. My adnojčy adsiekli i damovilisia, jak budziem dziejničać, padpisaŭšy hetyja 28 prahram. Tam niama zamachu ni ŭ adnoj prahramie na našy suvierenitet i niezaležnaść», — reziumavaŭ Alaksandr Łukašenka.
