Dniami ŭsie ajčynnyja ŚMI ablacieła navina pra najvialikšy ŭ historyi niezaležnaj Biełarusi džekpot sumaj u 766 miljonaŭ 955 tysiač 510 rubloŭ. Dahetul najvialikšy pryz u Biełarusi składaŭ 500 000 000 rubloŭ.

Samaje cikavaje, što ščaślivaha ŭładalnika miljonaŭ znajści pokul nie atrymałasia. Ale ž u jaho jość šeść miesiacaŭ, kab zajavić ab svaim pravie na vyjhryš. Inakš zasnavalniki abiacajuć pieradać vyjhryš u dziciačyja damy.

Dla daviedki varta adznačyć, što łatareju «Sportłato» pravodzić kampanija «Sport-pary». Kažuć, što adnym z zasnavalnikaŭ jaje źjaŭlajecca «Prezidencki spartyŭny kłub». A apošni, jak viadoma, uznačalvaje siaredni syn Alaksandra Łukašenki Dźmitryj.

Mnohija maje znajomyja, dyj sam ja, pačali ŭžo ŭjaŭlać siabie na miescy pieramožcy. I sapraŭdy, čamu b nie pamaryć. 737 limonaŭ! Bolš za 270 tysiač dalaraŭ! Možna adrazu nabyć kvateru, novuju mašynu i reštu žyćcia žyć na pracenty. Možna navat zvolnicca navat z daloka nia samaj horšaj pracy i pasprabavać svaje siły va ŭłasnym biznesie. Dy ci mała mahčymaściaŭ, kali maješ na rukach takuju sumu. Adnym słovam, son, mara, mroja...

Ale ž mroja heta tolki dla mianie i maich siabroŭ. Akazvajecca, u Biełarusi jość ludzi, dla jakich hetkija mary napeŭna mohuć pryśnicca tolki ŭ žachlivym śnie. Čamu ŭ žachlivym? Bo ź ich vyšyni maryć pra kvatery i mašyny heta ŭdzieł žabrakoŭ.

Usie ajčynnyja ŚMI iznoŭ ablacieła navina pra Jaŭhiena Šyhałava, staršyniu praŭleńnia Handlovaha domu «Ždanovičy». Biznesoviec całkam kampensavaŭ naniesienuju dziaržavie škodu pamieram 85 miljardaŭ rubloŭ. Dla lepšaha ŭsprymańnia kanviertujem sumu ŭ bolš likvidnuju valutu i atrymajem ličbu, bolšuju za 30 miljonaŭ dalaraŭ. Voś heta džekpot!

Dla tych, chto nie ŭ temie, nahadaju, što Šyhałava aryštavali i źvinavacili ŭ złoŭžyvańni słužbovymi paŭnamoctvami, vynikam čaho stała naniasieńnie škody ekałahičnamu asiarodździu. Pad ćmianaj farmuloŭkaj miełasia na ŭvazie budaŭnictva handlovaha centru biez adpaviednaha dziaržaŭnaha dazvołu. Paźniej jon byŭ vyzvaleny pad zastavu 10 miljardaŭ rubloŭ (kala 3,5 miljonaŭ dalaraŭ).

Ja čamuści pierakanany, što hetyja hrošy byli ŭ biełaruskaha biznesoŭca zusim nie apošnimi. Tym nie mienš, farmuloŭki «naniasieńnie škody ekałahičnamu asiarodździu» ŭ vyniku budaŭnictva handlovaha centru... na fonie dziejnaści roznych NPZ i «Azotaŭ» dy płanaŭ na budaŭnictva AES vyhladajuć niejak niedarečna. Razumieju, što naša «pravavaja» dziaržava ličyć siabie hetkim Robin Hudam, śviaty abaviazak jakoha — zabrać hrošy ŭ bahatych i addać biednym, ale ž u taki altruizm vierycca ź ciažkaściu.

Ni dla koha nie sakret, što ŭ našaj viertykalna-kłanavaj dziaržavie, pabudavanaj na adkatna-administratyŭnaj ekanomicy, jurydyčna biazhrešnych ludziej z hetkimi biudžetami być nie moža. Tamu ščaślivy 85-miljardny džekpot Šyhałava dla dziaržavy vyhladaje zusim nie vypadkovaściu. Ułasna kažučy, jak i najvialikšy ŭ historyi niezaležnaj Biełarusi džekpot sumaj 766 miljonaŭ 955 tysiač 510 rubloŭ ad «Prezidenckaha spartyŭnaha kłubu».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?