Fota: Minabarony RF
Raznaradka na zbor najmienšych značnych pazityŭnych infarmacyjnych nahod pastupiła kiraŭnikam kampanij z enierhietyčnaj, transpartnaj i kamunikacyjnaj śfier, a taksama kiraŭnikam rasijskich rehijonaŭ.
Sacyjalnaje samaadčuvańnie rasijan źnižajecca, raście tryvožnaść i ŭžo nazapasiłasia stomlenaść ad zaciahnutaj vajny. U hetych umovach Pucin pavinien vyrazna asacyjavacca ŭ hramadzian z čymści pazityŭnym, być «viaščalnikam dobrych navin», tłumačać łohiku dva nie źviazanyja adzin z druhim čynoŭniki.
«Inkubatar dobrych navin» — technałohija, jakaja zvyčajna vykarystoŭvajecca padčas vybaraŭ, — užo pracuje, źviartajuć uvahu krynicy The Moscow Times. U publičnym hrafiku Pucina razam z pasiadžeńniami Rady Biaśpieki i mižnarodnymi zvankami źjavilisia takija mierapryjemstvy, jak uračystaje adkryćcio centra pa vytvorčaści indyčki i sacyjalnych abjektaŭ, vinšavańnie ź jubilejem dziaržkarparacyj «Rasatam» i «Rastech», adkryćcio adramantavanaj aŭtadarohi.
Šukać novyja «pazityŭnyja naviny», u jakich moh by paŭdzielničać Pucin, daručana dziasiatkam dziaržkampanij. Jany, pavodle zadumy Kramla, pavinny załatać dzirku ŭ imidžy prezidenta Rasii i dapamahčy dziaržprapahandzie, jakaja imkliva hublaje TB-aŭdytoryju i ŭsio horš spraŭlajecca z pošukam arhumientaŭ na karyść vajny, jakaja praciahvajecca amal hod.
Niaŭdačy na froncie, mabilizacyja i pahroza dalejšaj straty zachoplenych ukrainskich terytoryj užo vymusili Pucina skaracić častatu publičnych mierapryjemstvaŭ i ŭpieršyniu za 10 hadoŭ zaviaršyć hod biez tradycyjnaj vialikaj pres-kanfierencyi. Zacisnuty pamiž pieramožnaj rytorykaj i kryvavaj realnaściu Kreml šukaje sposaby znoŭku skleić raźbity kubak prapahandysckaha naratyvu. Ale daremna: praviedzienyja na zamovu Kramla niepubličnyja apytańni pakazali, što za mirnyja pieramovy z Ukrainaj vystupajuć 55% rasijan, za praciah vajny — 25%.
Luboje vykazvańnie ab adstupleńni imhnienna pavyšaje antyrejtynh, kaža surazmoŭca The Moscow Times, čynoŭnik Kramla. «Ab zdačy Chiersona načalnik maŭčyć užo bolš za miesiac, — adznačaje jon. — Vykručvajucca inšyja».
