Ołaf Šolc. Fota: Michael Sohn / AP
Kancler Niamieččyny Ołaf Šolc dapuskaje dalejšyja pieramovy z prezidentam Rasii Uładzimiram Pucinym ab zakančeńni vajny RF suprać Ukrainy. «Naša meta zaklučajecca ŭ tym, kab Rasija spyniła svaju ahresiŭnuju vajnu, a Ukraina abaraniła svaju cełasnaść», — zajaviŭ kiraŭnik niamieckaha ŭrada vydańniu Süddeutsche Zeitung (SZ), jakoje apublikavała hutarku ŭ subotu, piša Deutsche Welle.
Dla hetaha «budzie nieabchodna razmaŭlać», rastłumačyŭ kancler.
«Jašče nieviadoma, ci adbudziecca heta pa telefonie, videasuviazi abo za doŭhim stałom», — dadaŭ Šolc. Maskva pavinna «ŭśviadomić, što tak dalej praciahvacca nie moža», adznačyŭ kiraŭnik urada FRH.
Ź jahonych słoŭ, Pucin pavinien «spynić vajnu, vyvieści vojski i takim čynam stvaryć mahčymaść dla ŭzajemarazumieńnia».
Šolc pakazaŭ na «vysokuju» mahčymaść eskałacyi ŭ śviatle niaŭdač RF na pole boju.
Niekalkim dniami raniej kancler FRH zajaviŭ, što prezident RF «fundamientalna praličyŭsia» ŭ svaim bačańni ŭładkavańnia jeŭrapiejskich krain i niedaacaniŭ adzinstva Jeŭropy i Zachadu. Kiraŭnik hiermanskaha ŭrada źviarnuŭ uvahu na maštabnuju padtrymku Ukrainy, u tym liku vajennuju dapamohu.
U pačatku śniežnia Šolc i Pucin upieršyniu ź siaredziny vieraśnia praviali telefonnuju razmovu. Kancler nastojvaŭ na nieabchodnaści jak maha chutčej dasiahnuć dypłamatyčnaha rašeńnia.
Razam z tym Šolc nie čakaje hazavaha kryzisu ŭ Hiermanii ni hetaj, ni nastupnaj zimoj.
Bierlin raźličvaje, što sumami, vyłučanymi ŭ ramkach užo zapuščanych dziaržaŭnych mier padtrymki, atrymajecca «źmiakčyć vysokija ceny hetaj i nastupnaj zimoj».
