Enierhietyčnaja biaśpieka nakštałt niezaležnaści dziaržavy, zajaviŭ i Alaksandr Łukašenka siońnia ŭ čas spravazdačy ministra enierhietyki Alaksandra Aziarca.

Kiraŭnik dziaržavy adznačyŭ, što siońnia pradaŭžajecca praktyka spravazdač kiraŭnikoŭ halin narodnaj haspadarki. Tydzień tamu byŭ zasłuchany načalnik Biełaruskaj čyhunki i razhledžany pytańni, źviazanyja ź dziejnaściu Mintransa. Jak zaŭvažyŭ kiraŭnik dziaržavy, dakład ministra enierhietyki pavinien byŭ adbycca značna raniej: Alaksandr Aziarec na hetaj pasadzie ŭžo niamała, z maja 2006 hoda. Pry naznačeńni kiraŭniku była kankretna pastaŭlena zadača madernizacyi nie tolki ŭsioj sistemy enierhietyki ŭ krainie, ale i samoj sistemy kiravańnia ministerstvam.

«Jon atrymaŭ kart‑błanš na kadravyja pytańni i byŭ papiaredžany,

što heta adna z centralnych pasad u našaj dziaržavie, pakolki enierhietyčnaja biaśpieka dla nas nakštałt niezaležnaści našaj dziaržavy. Dumaju, što Alaksandr Aziarec za hety pieryjad zrabiŭ niamała», — skazaŭ kiraŭnik dziaržavy, dadaŭšy, što ŭ čas spravazdačy ministr pavinien raskazać nie tolki ab pośpiechach haliny, ale i ab isnujučych prablemach i šlachach ich vyrašeńnia.

Pavodle słoŭ Alaksandra Łukašenki, dziaržava niamała zrabiła dla pavyšeńnia nadziejnaści i efiektyŭnaści raboty paliŭna‑enierhietyčnaha kompleksu. Bieśpierabojna zabiaśpiečvajucca elektryčnaj enierhijaj, ciapłom i hazavym palivam pramysłovyja i sielskahaspadarčyja pradpryjemstvy, sacyjalna‑bytavyja abjekty i nasielnictva. Zładžanaja rabota enierhietyčnaj haliny daje mahčymaść stabilna pracavać ekanomicy i palapšać žyćcio ludziej. Niemałuju rolu ŭ hetym adyhryvaje hazifikacyja. I ciapier Biełaruś zajmaje adno ź viadučych miesc u śviecie pa ŭzroŭniu hazifikacyi: usie 118 rajonnych centraŭ krainy, 738 ahraharadkoŭ hazifikavany.

Łukašenka chacieŭ by pačuć ad ministra enierhietyki, jak idzie realizacyja kancepcyi enierhietyčnaj biaśpieki, što kankretna zroblena pa źmianšeńniu ŭdzielnaj vahi pryrodnaha hazu ŭ paliŭna‑enierhietyčnym bałansie, vytvorčaści ciepłavoj i elektryčnaj enierhii.

Pry hetym Alaksandr Łukašenka nahadaŭ, što adzin z važniejšych instrumientaŭ vykanańnia nazvanaj kancepcyi — Dziaržaŭnaja kompleksnaja prahrama madernizacyi asnoŭnych vytvorčych fondaŭ enierhietyčnaj sistemy Biełarusi. Ministerstva enierhietyki vyznačana kaardynataram dziejnaści pa vykanańniu hetaj prahramy. Siońnia Alaksandr Aziarec paviedamić, jak idzie rabota ŭ hetym napramku, što zroblena pa madernizacyi asnoŭnych vytvorčych fondaŭ enierhietyčnaj sistemy, ci atrymany kankretnyja vyniki pa enierhaźbieražeńniu, źnižeńniu zatrat. Razmova pojdzie taksama ab rabocie torfapierapracoŭčych pradpryjemstvaŭ.

Akramia taho, budzie abmierkavana, jak u cełym paŭpłyvała na paliŭna‑enierhietyčny kompleks pravodzimaja ŭ apošnija try hady rearhanizacyja sistemy i struktury kiravańnia halinoj. Nie mienš važnaje pytańnie — padrychtoŭka da budaŭnictva ŭ Biełarusi AES.

«Što niedapuščalna ŭ paliŭna‑enierhietyčnaj śfiery — heta fakty nieefiektyŭnaha vykarystańnia i navat prysvajeńnie biudžetnych srodkaŭ, u vyniku čaho pravaachoŭnymi orhanami ŭzbudžany i rasśledujucca kryminalnyja spravy», — skazaŭ Łukašenka.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?