Hramadzian, jakim časova budzie abmiežavana prava vyjezdu za miažu, papiaredziać ab hetym.

«Nie paźniej za adzin dzień z daty pryniaćcia rašeńnia ab uklučeńni hramadzianina ŭ śpis nievyjaznych adpaviedny orhan abaviazany pra heta papiaredzić jaho. Toje samaje datyčycca i pytańnia z vyklučeńniem z takoha śpisa»,

— paviedamiła namieśnica dyrektara Nacyjanalnaha centra zakanadaŭstva i pravavych daśledvańniaŭ Ludmiła Panfiorava na pres-kanfierencyi z nahody pryniaćcia Zakonu «Ab paradku vyjezdu z Respubliki Biełaruś i ŭjezdu ŭ Respubliku Biełaruś hramadzian Respubliki Biełaruś».

Pavodle novaha zakonu, prava na vyjezd z krainy moža być abmiežavana ŭ dačynieńni da hramadzian, jakija vałodajuć źviestkami, što ŭjaŭlajuć dziaržaŭnuju tajamnicu. Kali čałaviek padazrajecca ci abvinavačvajecca ŭ kryminalnaj spravie, kali jon asudžany za ździejśnienaje złačynstva ci za im ustalavany previentyŭny nahlad. A taksama ŭ vypadku nievykanańnia nakładzienych na jaho sudom majomasnych, padatkovych i inšych abaviazkaŭ.

«Usie padstavy źjaŭlajucca fakultatyŭnymi, — zaznačyła Ludmiła Panfiorava. — Heta nie aznačaje, što čałaviek, kali jon vałodaje dziaržaŭnaj tajamnicaj, stanovicca nievyjaznym. Heta niapravilnaje razumieńnie normaŭ zakonu. U adnosinach da kožnaha hramadzianina asobna ŭ kožnym kankretnym vypadku adpaviedny orhan pavinien razhladać rašeńnie ab zabaronie vyjezdu za miažu».

Načalnik Departamienta pa hramadzianstvu i mihracyi MUS Biełarusi Alaksiej Biahun paviedamiŭ, što na praciahu hoda kolkaść biełarusaŭ, jakim časova abmiežavany vyjezd za miažu, składaje 100 tysiač čałaviek. Ale jon vykazaŭ upeŭnienaść, što paśla ŭstupleńnia novaha zakonu ŭ siłu heta kolkaść skaracicca.

Pavodle novaha zakonu, dla vyjezdu za miažu niepaŭnaletniaha ŭ supravadžeńni adnaho z baćkoŭ zhoda druhoha nie patrabujecca. Kali dzicionak vyjazdžaje z kimści inšym, to dazvoł patrebien ad abodvuch baćkoŭ.

Zakon ustupaje ŭ siłu 26 sakavika 2010 hoda.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?