Vyśviatlajecca, słova litaratura ŭ Siecivie było niezaniataje.
Hetym u indyvidualna-anarchisckim paradku skarystalisia huru biełaruskaha pierakładu Siarhiej Šupa i Jan Maksimiuk, jakich nie zmahli pierakanać dałučycca ani pierakładnickija hurtki, ani hrupy, ani kalektyvy nakštałt časopisa pierakładnoj litaratury «PrajdziŚviet».
Siarhiej i Jan vyrašyli zastacca jak jość, sami pa sabie, kab hrać pa svaich notach i vyrablać usio, što im strelnie ŭ hałavu - adnym słovam, stvaryli sajt pierakładnoj litaratury litaratura.org.
«Zvyčajna piatničnymi viečarami my ź Janam u zacišku jakoj pražskaj piŭnicy, vinarni abo čajoŭni viadziem razmovy pra litaraturu i nia tolki — razmovy biaskoncyja, raspačatyja jašče hadoŭ 20 tamu, — kaža adzin sa stvaralnikaŭ sajtu, pierakładčyk Siarhiej Šupa. - Vielmi časta ŭ takich siadzieńniach sparadžajucca niejkija tvorčyja impulsy, robiacca adkryćci — novyja aŭtary, teksty… movy. Karaciej — usiamu hetamu zachaciełasia znajści vyjście».
Što budzie na sajcie litaratura.org? Najpierš aboje-huroje padhrabli uvieś svoj dasiulešni darobak, raskidany pa roznych efiemiernych publikacyjach na papiery i ŭ Siecivie, usio, što rabiłasia dla dušy, u šufladu, biez spadziavańniaŭ niekudy pryładavać.
Tut i irłandziec Džejms Džojs, i izrailec Ethar Kieret, i francuz Barys Vijan, i palak Bruna Šulc.
Kali pierakładniki arhanizujuć usio heta da kanca, i abładziać usie skarby, tady jany abiacajuć pierakładać toje, čym buduć aktualna natchniacca. Skažam, Siarhieja Šupu siońnia niepakoić
kopcki aleksandryjski piśmieńnik Idvar Al-Charat, viadučy jehipiecki intelektuał-encykłapiedyst, pra jakoha ŭ Biełarusi pakul što viedajuć niedastatkova, a darma. U bližejšych płanach sajtu dźvie knihi: «Bieły zavoj» Antanasa Škiemy i «Inšała, Madona, inšała» Milenka Jerhaviča.
Pieračytałamu «Paleskich rabinzonaŭ» i ledź nia pamierłamu ad niastraŭnaści Janu Maksimiuku zachaciełasia znajści niejkuju prystojnuju «knižku dla moładzi» i pierakłaści, kab viarnucca da zdaroŭja. Tamu jon abiełarusiŭ kavałak adnoj fajnaje apovieści sa šviedskaj (nie kaža jakoj). «Voś ja hladzieŭ, jak Siarhiej biarecca za roznyja nievierahodnyja zaniatki, ułučna ź ihroj na bas-hitary, i serca mnie kryvioj ablivałasia ad taho, što jon nie pierakładaje, — dadaje Maksimiuk. — Litaratura.org — heta takaja chitraja pastka na jaho, pastaŭlenaja bratami Maksimiukami, kab znaŭca dvuchznačnaj kolkaści moŭ Siarhiej Šupa pačaŭ znoŭ pierakładać, mimochadź navučyŭšysia jakim 6-8 novym».
