Prodaž prasieŭ, rynak u stupary
Sioleta na rynku nieruchomaści Biełarusi nazirałasia adrazu niekalki cikavych tendencyj, na jakija paŭpłyvała palityčnaja situacyja ŭ krainie i rehijonie.
U pieršy miesiac paśla napadu Rasii na Ukrainu prodaž kvater u Biełarusi zaŭvažna prasieŭ. Kali ŭ lutym u stalicy było zarehistravana 1205 ździełak, to ŭ sakaviku hetaja ličba skaraciłasia da 1026. Tendencyja na źmianšeńnie kolkaści ździełak u sakaviku nazirałasia pa ŭsioj krainie. Uviesnu ryełtary kazali, što ludzi byli ŭ stupary, nie viedali, što rabić dalej. Častka ździełak, jakija abmiarkoŭvalisia da 24 lutaha, u vyniku sarvałasia.
Takija pavodziny kupcoŭ pryviali da imklivaha źnižeńnia cany «kvadrata». U sakaviku byŭ pastaŭleny svajeasablivy antyrekord, kali cana prapanovy kvadratnaha mietra ŭ Minsku za tydzień apuściłasia na 29 dalaraŭ. Takoha rezkaha padzieńnia cen na kvatery stalica nie bačyła z 2009 hoda.
Prodaž adnaviŭsia, a ceny — nie
Tym nie mienš, z časam rynak stabilizavaŭsia, u kastryčniku Minsk navat pastaviŭ rekord pa ŭhodach z kvaterami. Tady za miesiac u Minsku zarehistravali 1458 uhod kupli-prodažu kvater, što stała rekordam dla hetaha miesiaca za apošnija 10 hadoŭ.
Adnak heta ŭsio adno nie dapamahło Minsku zachavać ceny, jakija byli da pačatku vajny. U lutym staličny «mietr», zhodna z danymi realnych ździełak, kaštavaŭ 1353 dalary. U vieraśni «mietr» u realnych ździełkach patańnieŭ da 1298 dalaraŭ. Jak pakazvaje statystyka Realt.by, vynikovyja ličby za hod buduć jašče bolš ścipłyja, bo navat zhodna ź indeksam cany prapanovy pa stanie na 12 śniežnia mietr u Minsku ŭ siarednim kaštuje 1189 dalaraŭ. Heta ŭzrovień 2007 i 2016 hadoŭ.
Indeks cen prapanoŭ kvater u Minsku. Skrynšot z sajta realt.by
Takim čynam, za 2022 hod «mietr» u stalicy patańnieŭ na 2,8 pracenta. Pry hetym Minsk zastaŭsia adzinym bujnym horadam Biełarusi, dzie nieruchomaść pa vynikach hoda stała bolš tannaja. U abłasnych centrach siaredniaja cana «kvadrata» vyrasła. Najmienšy pryrost cen pakazaŭ Brest — plus 5,4 pracenta. Najbolš prykmietna ceny na nieruchomaść vyraśli ŭ Homieli — plus 11,6 pracenta.
Źnižeńnie cen na nieruchomaść u Minsku ryełtary tłumačać tym, što stalica bolš za rehijony adčuła na sabie ŭsie niehatyŭnyja nastupstvy vajny. Mienavita ŭ Minsku była najbolšaja kancentracyja biznesu ŭ cełym i IT-siektara ŭ pryvatnaści. Apošni ad pačatku hoda skaraciŭsia na 13,3 tysiačy čałaviek.
Rekordna nizki popyt na ofisnyja pamiaškańni
Masavy rełakiejt IT-kampanij, sychod častki zachodniaha biznesu i ekanamičnaja situacyja ŭ krainie ŭ cełym zaŭvažna paŭpłyvali na rynak kamiercyjnaj nieruchomaści. Ličba svabodnych ofisnych pamiaškańniaŭ ciaham hoda praciahvaje pavialičvacca.
Prapanova ofisaŭ značna pieravyšaje popyt. Svabodnyja pamiaškańni možna znajści ŭ 117 biznes-centrach sa 141.
Na rynku arendy ofisaŭ źjaŭlajecca ŭsio bolš płoščaŭ, jakija raniej zdymali IT-kampanii. U paraŭnańni z 2019 hodam svabodnych ofisnych płoščaŭ u Minsku stała bolš u piać razoŭ.
BC Fortune. Fota: sigmapolus.com
Pryčyny vyzvaleńnia ofisaŭ nie zaŭždy źviazanyja z rełakacyjaj biznesu. Častka biznesu prosta aptymizuje vydatki, pierajazdžaje ŭ pamiaškańni mienšaha pamieru, pieravodzić supracoŭnikaŭ na «addaleny charaktar pracy».
Raście kolkaść kvater dla doŭhaterminovaj arendy
Kolkaść prapanoŭ pa arendzie raście nie tolki ŭ śfiery kamiercyjnaj nieruchomaści. Z pačatkam sioletniaj chvali mihracyi značna pavialičyłasia kolkaść prapanoŭ pa zdačy kvater u doŭhaterminovuju arendu.
Pa stanie na listapad 2022 hoda, popyt na arendu kvater u Minsku źniziŭsia na 9 pracentaŭ u paraŭnańni z anałahičnym pieryjadam minułaha hoda.
Kolkaść svabodnych dla zasialeńnia kvater u stalicy praciahvaje pavialičvacca: za ŭvieś listapad u bazie Realt.by fihuravała na 2,6 pracenta kvater bolš, čym miesiacam raniej. Paralelna z rostam ličby prapanoŭ mienšaje kolkaść zapytaŭ «źniać kvateru ŭ Minsku», pa vynikach listapada skaračeńnie skłała 2,5 pracenta.
Jak vynikaje sa statystyki, 2022 hod staŭ davoli składanym dla rynku nieruchomaści. U Biełarusi dalej praciahvajuć skaračacca abjomy budaŭnictva. Skaračajecca kolkaść ludziej, zaniatych u budaŭničaj halinie. Tolki za 9 miesiacaŭ biahučaha hoda adtok zaniatych u budaŭnictvie skłaŭ amal 9 tysiač čałaviek. Ale hety trend zaradziŭsia nie sioleta: kolkaść zaniatych u budaŭnictvie piermanientna skaračajecca, pačynajučy sa žniŭnia 2020 hoda.
Čytajcie taksama:
U centry Minska na prodaž vystavili kvateru, u jakoj cana mietra — 6829 dalaraŭ. Hladzicie, što ŭnutry
Pa jakich cenach pradajuć kvatery ŭ staličnych novabudoŭlach? Voś dzie samyja tannyja varyjanty
