Fanipal. Žnivień 2020 hoda.
Apošniaja abłava adbyłasia 24 studzienia 2023 hoda. Padčas jaje zatrymali kala 20 čałaviek. Siarod ich — žonka palitźniavolenaha Ihara Pastuchova Taćciana, Rabčenia, Vajtovič, Hajdukievič, Taćciana Załatar, Mikałaj i Natalla Hubiny, Maksim Sambros, Ładaryja Kuźniacova, paviedamlajuć pravaabaroncy.
Miascovyja naličyli 15 zatrymanych znajomych, ale ŭ milicyi skazali, što zatrymana 20 čałaviek. Suprać ich zaviali kryminalnyja spravy. U dačynieńni da žančyn abrali miery strymańnia, nie źviazanyja z pazbaŭleńniem voli, ich vyzvalili z padpiskami ab niavyjeździe, paručalnictvami, pad zakład.
«Adnu dziaŭčynu zatrymali z hrudnym dziciem. Treba skazać, što čałaviečny ŭ nas HUBAZiK — nie kinuli hrudnoje dzicia adno doma, a pryvieźli z maci ŭ Dziaržynski RAUS», — raspaviadajuć miascovyja žychary.
Pavodle miascovych, žonka adnaho z zatrymanych 24 studzienia była mocna źbitaja.
Častku zatrymanych advieźli adrazu ŭ IČU na Akreścina, a častku pakinuli ŭ IČU Dziaržynskaha RAUSa.
«U nas siadzieli, jak i ŭsiudy siadziać: ni paścielnaj bializny, ni matracaŭ. U našym IČU niama haračaj vady — tolki chałodnaja. Naturalna, nijakaha duša. Prahułak u našym IČU ŭ nas nikoli nie było», — kažuć miascovyja pra ŭmovy ŭtrymańnia.
Žychary Fanipala raspaviadajuć, što ŭ miascovym telehram-čacie supracoŭniki milicyi zaklikajuć miascovych pisać jaŭki z pavinnaj.
Jak śćviardžajuć miascovyja, supracoŭniki HUBAZiKa praciahvajuć identyfikavać ludziej pa videa, jakoje zafiksavała mitynh 12 žniŭnia 2020 hoda. Na jaho patrapiŭ uvieś natoŭp — bolš za 600 čałaviek. Tamu žychary zaklikajuć pakłapacicca pra svaju biaśpieku, kali jość peŭnyja ryzyki.
«Rajon zastajecca pratesnym dahetul: ściažki na drevach, pikiety i h. d. pierad Novym hodam sabrali bolš za 2 000 rubloŭ na padarunki dzieciam palitviaźniaŭ. My navat zadanacili 200 dalaraŭ na połk Kalinoŭskaha, a tyja ŭ adkaz ad Kojdanava snarad padpisali», — adznačajuć žychary Fanipala.
