Pa słovach Dzianisa Dabravolskaha, vybar ryby i morapraduktaŭ zaležyć ad cany i siaredniaha kašalka, jakim vałodaje biełaruskaja siamja. Hruntujučysia na štomiesiačnaj realizacyi ŭ handlovaj sietcy «Jeŭraopt», možna vydzielić top-6 najmieńniaŭ.
Pieršaje miesca zajmaje mintaj — ryba ź siamiejstva traskovych.
Na druhim miescy chiek, jaki zakuplajecca z Kanady i ZŠA. Praŭda, ciapier z-za sankcyj ZŠA niepasrednych pastavak nie viaduć.
Treciuju i čaćviortuju pazicyi zajmajuć skumbryja i sieladziec.
Piataje miesca možna addać siomzie i stronzie.
Šostaje miesca zajmaje tuniec — za apošnija hady jon u niekalki razoŭ vyras pa kolkaści spažyvańnia, i ŭ vyniku pavialičyłasia kolkaść pastavak u krainu.
Pry hetym, kamientujučy piatuju pazicyju, to-bok siomhu i stronhu, śpiecyjalist adznačaje, što siamiejstva łasasiovych, da jakoha jany naležać, maje šeść vidaŭ ryby ŭ žyvoj pryrodzie, i łoviacca jany najpierš na rasijskim Dalokim Uschodzie.
«Heta tak zvany dalokaŭschodni asartymient, da jakoha naležać harbuša, kieta, nierka, kižuč, čavyča i halec. Heta tyja vidy łasasiovaj ryby, jakija vielmi karysnyja i smačnyja, tamu, biez zaležnaści ad cany, choć čaściakom jany tańniejšyja za stronhu ci łasosia, ja im addaju pieravahu, kali ŭbaču na pryłaŭku», — kaža Dzianis Dabravolski.
Łasoś i stronha hadujucca štučna i tamu mienš karysnyja, čym pieraličanyja šeść vidaŭ ryby. Praŭda, tendencyja takaja, što bolšaść spažyvanaj ryby ŭ najbližejšyja 50—100 hadoŭ tak ci inačaj budzie hadavacca štučna, bo akijan aktyŭna zabrudžvajecca.
Rehijony pastavak ryby ŭ Biełaruś ciapier dastatkova šyrokija. Pierš za ŭsio heta rehijon Barancava i Paŭnočnaha moraŭ. Da ich adnosicca Narviehija, trochi Isłandyja i Farerskija astravy.
«Kali my hladzim na abjomy i vidy bazavaj ryby, jakaja zavozicca, to dva asnoŭnyja rehijony pastavak — heta Japonskaje i Barancava mora.
Kali kazać pra krainy, to na pieršym miescy pa abjomach pastavak budzie Rasija — adtul da nas pryjazdžaje prykładna 50% ryby, zatym Narviehija z častkova Isłandyjaj i Farerskimi astravami, paśla ich Kanada i ZŠA, jakija pastaŭlajuć chieka, 40 vidaŭ marskoha akunia i roznyja vidy pałtusa i kambały».
U amierykanski siehmient pastavak taksama ŭvachodziać Arhiencina i Uruhvaj, adtul taksama pastaŭlajecca chiek. A z Novaj Ziełandyi, naprykład, impartujucca takija nie zusim typovyja vidy ryby, jak jadomaja akuła-pryvid, 3—4 vidy dory i čyrvonaja traska.
Što tyčycca łahistyki pastavak, to ŭsia ryba ŭ Biełaruś, kali heta nie Mytny sajuz, histaryčna zavozicca praz adzin Kłajpiedski port u Litvie.
Čytajcie taksama:
«Rybu lubicie?» Dzieci raskazali Ramanu Hałoŭčanku, što jany lubiać u školnym charčavańni
«Kupili stejki pa pryvabnaj canie i ździvilisia». Što za čyrvonaja ryba pryjechała ŭ našy kramy?
