Kazačny hieroj Pinokia, nos jakoha kožny raz adrastaŭ, kali jon havaryŭ niapraŭdu. Aŭtar malunka — Džordža Skapineli. Vyjava: Wikimedia Commons
Hałoŭnaje pry vyjaŭleńni chłuśni — naša naziralnaść. Isnuje šerah pryjomaŭ, jakija nam dapamohuć vyjavić niaščyraść subiasiednika.
Na pieršym miescy staić maŭleńnie našaha surazmoŭcy.
Zvyčajna, kali čałaviek padmanvaje, jon adčuvaje niehatyŭnyja emocyi. Jany źviazanyja ci sa stracham być vyjaŭlenym, ci z pačućciem viny («muki sumleńnia»).
Kali naš subiasiednik chłusić, to źmianiajecca chutkaść i tembr hołasu. Takim ža śviedčańniem moža być vahańnie pierad adkazam ci raptoŭnaje zaikańnie, doŭhija paŭzy.
Adkazy stanoviacca mienš kankretnymi, mienš strukturavanymi i časam pazbaŭleny paśladoŭnaści. Akramia taho, jany ŭklučajuć bolš padrabiaznaje apisańnie taho, što nie adbyłosia.
Voś niekalki stratehij, jakija dapamohuć pierachitryć chłusa.
Zachoŭvajcie ŭ razmovie pazicyju adkrytaści i padtrymki. Demanstrujcie svoj davier da słoŭ surazmoŭca.
Starajciesia zadavać adkrytyja pytańni i davajcie čałavieku vykazacca. Heta prymusić surazmoŭca bolš havaryć, dadumvać detali.
Vypracujcie praviły ŭzajemadziejańnia. Prostaja damova ŭ pačatku razmovy havaryć praŭdu ŭskładniaje chłuśniu, nakładaje na chłusa dadatkovy maralny ciažar i pavialičvaje stres.
Stvarajcie kahnityŭnuju pierahruzku. Viadoma, što lepš za ŭsio čałaviek trymajecca, kali jon raspaviadaje padrychtavanuju zahadzia viersiju padziej. Tamu takuju chłuśniu ciažka vyjavić. Sprabujcie razburyć taki apovied niečakanymi pytańniami ci paprasicie ŭdakładnić detali. Nu i najbolš raspaŭsiudžany pryjom — paprasić raspavieści historyju zzadu napierad.
Akramia ŭłasna maŭleńnia, jość šerah nievierbalnych prykmiet.
Navukoŭcy vyjavili, što ruchi cieła mohuć zrabić mahčymym vyjaŭleńnie chłuśni ź vialikaj dakładnaściu (ad 75 da 82% u zaležnaści ad stratehii apytańnia) niezaležna ad kulturnych adroźnieńniaŭ.
Chłusa vydajuć niespakojnyja ruchi rukami (prykryćcio rota padčas razmovy, dotyk da roznych častak tvaru, pryhładžvańnie vałasoŭ, papraŭka halštuka).
Padmanščyk čaściej mirhaje i daŭžej trymaje pavieki zakrytymi. U mužčyn časta nazirajecca žadańnie cierci vočy padčas utojvańnia praŭdy.
Ludzi, jakija nosiać akulary, niaredka vykarystoŭvajuć ich dla taho, kab schavać sapraŭdnyja dumki i emocyi. Kali vy bačycie, što čałaviek pačaŭ niešta rabić z akularami, to jon vidavočna sychodzić ad adkazu, na abdumvańnie jakoha jamu patrabujecca čas.
Šmat mohuć skazać vočy.
Pry narmalnym kantakcie, kali ludzi havorać praŭdu, pozirki sustrakajucca kala 2/3 času ŭsioj razmovy. Kali čałaviek nie ščyry ci chavaje što-niebudź, to jaho vočy buduć sustrakacca z vačyma surazmoŭcy mienš za 1/3 usiaho času kamunikacyi. Pry hetym jon budzie imknucca advieści pohlad ubok, hladzieć u stol, uniz i inš.
Źviartajcie asablivuju ŭvahu na toje, jak ruchajucca vočy subiasiednika. Pierš čym sprabavać vyznačyć pa vačach, chłusić ci nie vaš partnior, niadrenna było b viedać jaho zvykłuju manieru pavodzin pry razmovie. Spačatku zadajcie jamu niejtralnaje pytańnie, na jakoje jon, napeŭna, adkaža biez chitraści. Skažam, što jon siońnia jeŭ na śniadanak? Kali vy zrazumiejecie, kudy hladzić čałaviek, kažučy praŭdu, pierachodźcie da toj temy, jakaja vas cikavić. Kali pry adkazie na prostaje pytańnie surazmoviec pahladzieŭ uvierch i naleva (prajhravaŭ adkaz z pamiaci), a pry adkazie na toje pytańnie, što vas cikavić, — uvierch i naprava, to heta moža być prykmietaj taho, što praŭdu vy nie pačuli.
Źviarnicie ŭvahu na praciahłaść fiksacyi vyrazu tvaru (uśmieški, ździŭleńnia). Sapraŭdnyja emocyi adlustroŭvajucca na tvary nie bolš za niekalki siekund. Kali vyraz tvaru nie mianiajecca zvyš piaci siekund, to vialikaja imaviernaść, što hetaja emocyja falšyvaja.
Źviartajem uvahu, što nielha tolki pa adnoj prykmiecie rabić vysnovu ab padmanie. Treba razhladać ich u sukupnaści.
Ź inšaha boku, nieabchodna pamiatać, što jość ludzi, dla jakich chłuśnia — narmalny stan. Jany adčuvajuć zadavalnieńnie ad jaje. Ich apoviedy maksimalna pierakanaŭčyja i naturalnyja. Takija ludzi nastolki dobra ŭžyvajucca ŭ rolu, što pieradajuć falšyvyja emocyi hetak ža lohka, jak i sapraŭdnyja. Tamu z takimi «pryrodžanymi chłusami» našy rekamiendacyi mała mohuć dapamahčy.
Akramia hetaha, vaš surazmoŭca moža vydatna viedać usie prykmiety padmanu i być natreniravanym. Heta asabliva ŭłaściva asobam publičnym, naprykład, akcioram ci palitykam.
Čytajcie jašče:
Toje, jak my trymajem kubak, raskryvaje asablivaści našaha charaktaru
