Dźmitryj Piaskoŭ. Fota: kremlin.ru
«Kali vy majecie na ŭvazie, skažam tak, vajnu ŭ šyrokim kantekście — heta supraćstajańnie z varožymi dziaržavami, ź niedružalubnymi krainami, heta hibrydnaja vajna, jakaja raźviazana imi ŭ adnosinach da našaj krainy, — to heta nadoŭha. I tut nam patrebna ćviordaść, upeŭnienaść u sabie, metanakiravanaść i jadnańnie vakoł prezidenta», — paviedamiŭ Piaskoŭ u sieradu na rehularnym bryfinhu z žurnalistami.
Taksama Piaskoŭ skazaŭ, što mety Rasii ŭ vajnie z Ukrainaj nie mohuć być dasiahnutyja palityka-dypłamatyčnym šlacham, a tolki vajennym.
Napiaredadni brytanskaja hazieta Guardian raspaviała, što Piaskoŭ padčas zvanaj viačery, na jakoj prysutničali pradstaŭniki rasijskaj kulturnaj i palityčnaj elity, papiaredziŭ, što ciapierašnija padziei praciahnucca jašče vielmi doŭha i treba rychtavacca da ciažkich časoŭ.
«Miarkuju, što vy čakajecie, kab ja niešta skazaŭ, — pryvodzić hazieta słovy kramloŭskaha pres-sakratara, pierakazanyja joj niezaležna dvuma ŭdzielnikami mierapryjemstva, jakoje prajšło niezadoŭha da Novaha hoda. — Budzie značna ciažej. Heta zojmie vielmi, vielmi šmat času».
Pa słovach adnaho z udzielnikaŭ razmovy, paśla hetych słoŭ, jakija vyklikali ŭ mnohich pačućcio niajomkaści, prysutnym stała jasna, što Piaskoŭ papiaredziŭ ich ab tym, što vajna nikudy nie dzieniecca i im treba rychtavacca da ciažkich vyprabavańniaŭ.
U svaju čarhu sakratar Rady biaśpieki RF Mikałaj Patrušaŭ u sieradu taksama abviaściŭ, što Rasija nie spynicca, pakul nie dasiahnie svaich hałoŭnych met u hetaj vajnie — «demilitaryzacyi i denacyfikacyi» Ukrainy.
«Niahledziačy na niaŭchilna ŭzrastajučuju vajskovuju dapamohu Ukrainie z boku ZŠA i inšych zachodnich dziaržaŭ, usie zajaŭlenyja mety śpiecyjalnaj vajennaj apieracyi buduć abaviazkova dasiahnuty. My damožamsia demilitaryzacyi i denacyfikacyi Ukrainy, zabiaśpiečym terytaryjalnuju cełasnaść Rasijskaj Fiederacyi i biaśpieku našaha nasielnictva», — zajaviŭ Patrušaŭ padčas sustrečy sakrataroŭ Radaŭ biaśpieki krain — členaŭ Šanchajskaj arhanizacyi supracoŭnictva ŭ Deli.
