Kali dzieci rastuć za horadam, jany z malenstva sutykajucca z faktarami, jakija mohuć stymulavać i ŭzmacniać imunnuju sistemu
Hipoteza hetaja, adnak, mahła spryjać pamyłkovamu pierakanańniu, što čyścinia nie abaviazkova prynosić karyść zdaroŭju. U rečaisnaści ž usio trochi pa-inšamu: hihijena zvyčajna datyčyć mikrobaŭ, jakija vyklikajuć infiekcyju; a mikroby, jakija mohuć prynieści karyść, vidavočna adroźnivajucca ad škodnych.
The Economist raskazvaje pra japonskaje daśledavańnie suviazi navakolnaha asiarodździa i dziciačaha zdaroŭja, u jakim daśledčyki adsočvali bolš za 100 000 ciažarnaściaŭ u pieryjad z 2011 pa 2014 hod. Jany šukali ŭzajemasuviaź pamiž žyćciom u kantakcie sa svojskimi žyviołami da i adrazu paśla naradžeńnia dziciaci i luboj charčovaj alerhijaj, dyjahnastavanaj ŭ pieršyja try hady žyćcia dziciaci.
22% z prykładna 66 000 paddoślednych dziaciej naradzilisia ŭ siemjach z chatnimi žyviołami i, takim čynam, padviarhalisia ŭździejańniu mikrobaŭ i inšych patencyjnych alerhienaŭ ad hetych žyvioł jak da, tak i paśla naradžeńnia. Daśledčyki vyjavili, što ŭ dziaciej u siemjach z sabakami kolkaść alerhij na jajki, małako i arechi nižejšaja za siaredni pakazčyk. A dzietki, jakija raśli z katami, byli bolš talerantnymi da jajek, pšanicy i soi.
A voś dzieci, čyje baćki trymali čarapach (vadzianyja čarapachi — papularnyja chatnija žyvioły ŭ Japonii), nie prademanstravali ŭvohule nijakaj karelacyi: vierahodna, uzajemadziejańnie z čarapachami nie ŭpłyvała na ŭsprymalnaść da alerhienaŭ. Pry hetym, što cikava, u tych, chto žyŭ razam z chamiakami, častotnaść alerhii na arechi była bolšaj, čym u siarednim.
Što mienavita ŭsio heta aznačaje, niezrazumieła. Ale adno patencyjna važnaje nazirańnie palahaje ŭ tym, što dla vyjaŭleńnia naziranych efiektaŭ nieabchodna było ŭździejańnie jak da, tak i paśla rodaŭ. Asobna adzin ad druhoha hetyja faktary nie pakazvali ŭzajemasuviazi z alerhijaj. Mahčyma, vyrašalnym faktaram stanovicca sam čas naradžeńnia, bo ličycca, što mienavita ŭ hety čas farmirujecca asnoŭnaja častka kišečnaj fłory dziciaci.
Pry hetym varta źviarnuć uvahu na mahčymyja dadatkovyja aśpiekty, jakija mahli paŭpłyvać na vyniki daśledavańnia. Sami daśledčyki adznačajuć, što ŭłaśniki svojskich žyvioł čaściej žyvuć va ŭłasnych damach, za horadam, a heta značyć, ź inšymi mahčymymi faktarami, jakija mohuć stymulavać i ŭzmacniać imunnuju sistemu. I inšaje: siemji, dzie jość ludzi, schilnyja da alerhii, naturalna, radziej trymajuć katoŭ i sabak. Takim čynam, nie tolki prysutnaść žyvioł-kampańjonaŭ, ale i hetyja dadatkovyja faktary mohuć rastłumačyć prynamsi častku efiektu. Kab paćvierdzić ci abvierhnuć suviaź pamiž ustojlivaściu dziciaci da alerhienaŭ i najaŭnaściu čatyrochłapych siabroŭ, spatrebiacca dadatkovyja daśledavańni.
Čytajcie taksama:
Dzieci vielmi lubiać hraź. I heta zvyškarysna dla ich imunitetu
