Čamu Babaryku mahli pieravieści ŭ turemny špital pry SIZA?

Viktara Babaryku z PK-1 dastavili ŭ navapołackuju haradskuju balnicu ŭ noč z 24 na 25 krasavika. Pa nieaficyjnaj infarmacyi, viaźnia dastavili ź pnieŭmatoraksam. 

«Pavodle najaŭnych źviestak, Viktar Babaryka kala tydnia znachodziŭsia ŭ Navapołackaj centralnaj haradskoj balnicy, paśla čaho, prykładna 3 maja, jaho zabrali ŭ navapołackuju PK-1, a na nastupny dzień pavieźli ŭ kirunku Minska (pavodle niepaćvierdžanych źviestak, na Vaładarskaha) u turemnuju balnicu», — paviedamiŭ učora telehram-kanał «Rabočaha ruchu».

Vasil Zavadski kaža, što pieravod źniavolenaha z hramadzianskaj balnicy ŭ Respublikanski špital dla asudžanych — zvyčajnaja praktyka:

«Kali čałaviek patrabuje bolš-mienš praciahłaha lačeńnia, a ŭ kałonii niama takich umoŭ (zrazumieła, što ŭ kałonii niama ni chirurha, ni nieabchodnych umoŭ dla lačeńnia takich chvorych), to jaho pieravodziać u Respublikanski špital.

Bo lačeńnie ŭ hramadzianskaj balnicy patrabuje adciahnieńnia dadatkovych sił i čałaviečych resursaŭ (nieabchodna zabiaśpiečyć kruhłasutačnuju achovu). Taksama ŭ balnicy niemahčyma zabiaśpiečyć infarmacyjnuju izalacyju źniavolenaha, u jakoj ciapier trymajucca ŭsie palitviaźni».

Były turemny lekar kaža, što niama abjektyŭnych źviestak, jakija dazvolili b zrabić vysnovy pra stan zdaroŭja palityka.

«Kali kazać pra pnieŭmatoraks, ź jakim Viktara Babaryku mierkavana dastaŭlali ŭ navapołackuju balnicu, to lačeńnie takoj patałohii zajmaje 2-3 tydni. Taki termin patrabujecca dla lačeńnia pry narmalnym ciačeńni chvaroby, biez uskładnieńniaŭ, pry naležnym miedyčnym dahladzie.

Paśla 2-3 tydniaŭ chvoraha mohuć vypisvać, ale heta nie značyć, što jon adrazu kiniecca ŭ skoki: chvory pavinien znachodzicca peŭny čas pad nahladam lekaraŭ», — kaža śpiecyjalist.

Respublikanski špital dla asudžanych: što saboj ujaŭlaje

Respublikanski špital znachodzicca na terytoryi SIZA-1 na Vaładarskaha.

«Raniej jon uvachodziŭ u skład kałonii №1, jakaja znachodziłasia na vulicy Kalvaryjskaj. Choć špital mieŭ svajo kiraŭnictva, ułasny štat, ale jon nie źjaŭlaŭsia samastojnaj jurasobaj, — raspaviadaje Vasil Zavadski. — Paźniej špital pieradali ŭ skład SIZA-1 na Vaładarskaha. Heta razhladałasia jak časovaja miera, bo tam vielmi mała pamiaškańniaŭ. Niekatoryja padraździaleńni znachodziacca ŭ Žodzinie (infiekcyjnaje adździaleńnie) i ŭ Vićbie (psichijatryčnaje adździaleńnie). Prynamsi, tak było, kali ja pracavaŭ u pienitencyjarnaj sistemie».

Što saboj ujaŭlaje špital?

«Kamiery Piščałaŭskaha zamka nazvali pałatami, dzie raźmiaścili chvorych i kabiniety dla piersanału. Biezumoŭna, umovy nie mohuć być dobrymi z punktu hledžańnia chvorych: lepš čym u zvyčajnych kamierach, horš čym u luboj hramadzianskaj balnicy.

Novy respublikanski špital musili zdać u ekspłuatacyju jašče ŭ pieršaj pałovie 2011 hoda, a ciapier na dvare ŭžo 2023-ci…» 

Pryčyny, pa jakich Babaryku mahli vypisać z atrada

Učora kanał MAYDAY (jaki viaduć pravaabaroncy z Mahilova) paviedamiŭ, što Viktar Babaryka, pa niepravieranaj infarmacyi, bolš nie ličycca ŭ svaim atradzie. Vasil Zavadski nazyvaje čatyry pryčyny, pa jakich palitviaźniaŭ mohuć vypisać z atrada.

Viaźnia mahli pieravieści ŭ inšy atrad navapołackaj papraŭčaj kałonii.

Viktara Babaryku z-za stanu zdaroŭja mahli pieravieści ŭ Respublikanski špital dla asudžanych: u vypadku, kali paškodžańni ŭ palitviaźnia byli surjoznyja i patrabavali praciahłaha času dla lačeńnia. 

Vypiska z atrada moža aznačać, što Viktara Babaryku pieraviali ŭ inšuju kałoniju na pastajannaj asnovie. Ci palitviaźnia vyzvalili, adnak hetaja pryčyna bačycca najmienš vierahodnaj. 

Jašče adnoj pryčynaj vypiski z atrada byvaje śmierć palitviaźnia, ale tut heta taksama vielmi małaimavierna. Isnuje farmalnaja pracedura, prapisanaja na zakanadaŭčym uzroŭni, pavodle jakoj pra śmierć źniavolenaha abaviazkova paviedamlajecca siamji.

«Kali źniavolenaha pieravodziać u inšuju kałoniju, to pra heta taksama abaviazanyja paviedamlać rodnym. A voś pra pieravod u inšy atrad, pra špitalizacyju nie abaviazanyja paviedamlać: heta časovaja miera, paśla vypiski źniavoleny zvyčajna viartajecca ŭ svoj atrad», — patłumačyŭ Vasil Zavadski.

Čytajcie taksama: 

Jeŭraparłamient zaklikaŭ vyzvalić Viktara Babaryku

Były palitviazień z navapołackaj kałonii raskazaŭ, jakoha kampramisu patrabavali ad Babaryki

Svajakam Babaryki admovili ŭ pryjomie da kiraŭnictva Departamienta vykanańnia pakarańniaŭ MUS

Клас
5
Панылы сорам
4
Ха-ха
1
Ого
3
Сумна
9
Абуральна
29