Kievin Spejsi ŭ akružeńni advakataŭ idzie ŭ sud. Fota: Dan Kitwood / Getty Images

Kievin Spejsi ŭ akružeńni advakataŭ idzie ŭ sud. Fota: Dan Kitwood / Getty Images

U sieradu ŭ karaleŭskim sudzie Saŭtuarka ŭ Łondanie pačynajecca sud nad halivudskim akcioram Kievinam Spejsi pa abvinavačańni jaho ŭ seksualnych damahańniach u dačynieńni da čatyroch mužčyn. Praces pradoŭžycca čatyry tydni. Płanujecca, što Spejsi budzie asabista prysutničać na kožnym słuchańni. Jaho abvinavačvajuć pa 12-ci epizodach roznaj stupieni ciažkaści, jak piša Bi-bi-si.

Da pačatku pieršaha pasiadžeńnia halivudski akcior prybyŭ biez spaźnieńnia ŭ atačeńni svaich advakataŭ.

Staršyniavać na pracesie budzie sudździa Mark Uoł. Abaronca akciora — Patryk Hibs, advakaty boku abvinavačańnia — Kryścin Ehńju i Šon Ryčy.

Heta nie pieršaja hučnaja sprava, jakaja budzie słuchacca ŭ rajonnym sudzie Saŭtuarka. U krasaviku 2022 hoda za ŭtojvańnie aktyvaŭ byŭ asudžany da 2,5 hoda turmy zorka tenisa Barys Biekier, a ŭ lipieni 2014-ha amal šeść hadoŭ atrymaŭ pavodle abvinavačańnia ŭ piedafilii brytanski televiadoŭca i partretyst karalevy Lizaviety II Rolf Charys.

Sutnaść abvinavačańniaŭ

Abvinavačańnie suprać Kievina Spejsi budujecca na 12-ci epizodach seksualnych damahańniaŭ, nieprystojnych pavodzinach seksualnaha charaktaru i seksualnaha hvałtu. Usie epizody, zhodna z materyjałami spravy, adbylisia ŭ pieryjad z 2001 pa 2013 hod.

U mai minułaha hoda Karaleŭskaja prakuratura Vialikabrytanii sankcyjanavała razhlad piaci epizodaŭ abvinavačańnia, a ŭ listapadzie 2022-ha — pazastałych siami.

Aficyjnaja pracedura razhladu była adkładzienaja, bo akcior znachodziŭsia za miežami Brytanii.

Bolšaja častka epizodaŭ, pavodle viersii abvinavačańnia, adbyłasia ŭ Łondanie. Adna skarha była padadzienaja ŭ suviazi ź incydentam, jaki adbyŭsia ŭ 2013 hodzie ŭ hrafstvie Hłasteršyr.

Usim mierkavanym achviaram ciapier ad 30 da 40 hadoŭ. Heta značyć, što na momant samaha daŭniaha epizodu, jaki razhladajecca, chtości ź ich moh być jašče niepaŭnaletnim.

Akcior nie pryznaje siabie vinavatym ni pa adnym punkcie.

Kaniec karjery

Kievin Spejsi vyras u Kalifornii, ale bolš za dziesiać hadoŭ pražyŭ u Łondanie, zajaviŭšy tady, što hety horad staŭ jaho druhim domam.

U 2014-2015 hh. jon kiravaŭ łondanskim teatram «Ołd Vik», akciory jakoha taksama skardzilisia na nieprystojnyja pavodziny mastackaha kiraŭnika.

Na chvali ruchu #MeTo hetyja i inšyja abvinavačańni nabyli šyrokuju ahałosku i kaštavali akcioru karjery.

Kievin Spejsi — dvuchrazovy ŭładalnik premii «Oskar». Jon zdymaŭsia ŭ takich filmach, jak «Siem», «Sakrety Łos-Andželesa», «Pryhažość pa-amierykansku», «Płanieta Ka-Peks» i «Mały na drajvie», a taksama ŭ sieryjale Netflix «Kartačny domik».

Paśla taho, jak vybuchnuŭ skandał, sceny z udziełam akciora vydalili ź niekalkich karcin, jakija na toj momant znachodzilisia ŭ vytvorčaści, film «Usie hrošy śvietu» terminova pieraźniali ź inšym akcioram u toj ža roli, stryminhavaja płatforma Netflix razarvała kantrakt sa Spejsi na zdymki ŭ «Kartačnym domiku».

U zaklučnym siezonie sieryjała Spejsi ŭžo nie źjaviŭsia.

Pieršy sud kamiakom

Praces, jaki pačynajecca ciapier u Łondanie, — treciaja kryminalnaja sprava suprać Kievina Spejsi, jakaja dajšła da suda. Adnak pieršyja dźvie akcior zdoleŭ vyjhrać.

Uletku 2019 hoda ŭ sudzie štata Masačusiets słuchałasia sprava ab seksualnych damahańniach akciora da 18-hadovaha chłopca na vostravie Nantakiet u 2016 hodzie.

Małady čałaviek, jaki akazaŭsia synam viadomaj televiadučaj Chiezer Anru, śćviardžaŭ, što Spejsi čaplaŭsia da jaho ŭ restaranie, papiarednie napaiŭšy jaho.

Adnak sprava razvaliłasia, tamu što bok abarony dakazaŭ šmatlikija parušeńni, dapuščanyja bokam abvinavačańnia, až da padtasoŭvańnia dokazaŭ.

U lipieni 2019 hoda prakuratura Masačusietsa źniała z akciora ŭsie abvinavačańni.

U kastryčniku 2022 hoda Kievin Spejsi taksama vyjhraŭ sud u Ńju-Jorku pa pazovie ab seksualnych damahańniach, padadzienym inšym akcioram Entani Repam.

Prysiažnyja pastanavili, što Rep nie zmoh dakazać svaje śćviardžeńni ab damahańniach halivudskaj zorki.

Клас
3
Панылы сорам
14
Ха-ха
6
Ого
1
Сумна
5
Абуральна
2