Bowl

Dziaŭčyna trymaje boŭł z łasosiem, manha, ahurkom, avakada, rysam, fasolaj edamame, imbiercam, nory, kunžutam i łajmam. Fota: Alexandre Kolesnikov / Getty Images

Pokie boŭł — heta sytnaja strava havajskaj kuchni z elemientami japonskaj. U aryhinalnym varyjancie jaje asnovu składajuć varany rys, syraja, zapiečanaja abo marynavanaja ryba, sous i niejkaja śviežaja harodnina ŭ jakaści dadatku. Boŭł u pierakładzie z anhlijskaj movy aznačaje «hłybokaja talerka, miska», tamu, u adpaviednaści z nazvaj, strava padajecca ŭ miscy.

«Pokie» ŭ pierakładzie z havajskaj aznačaje «narezać na kavałački». Tak nazyvajecca narezanaja kubikami syraja ryba, jakuju na Havajach padajuć albo ŭ jakaści zakuski, albo jak asnoŭnuju stravu.

U jeŭrapiejskaj kultury boŭłavy «bum» zdaryŭsia adnosna niadaŭna, hadoŭ piać tamu ŭ asnoŭnym dziakujučy instahramnym fud-błohieram, dla jakich hałoŭnaje, kab u kadry ježa vyhladała pryvabnaj i była pažyŭnaj. Tamu pryhoža raskładzienyja ŭ miscy pradukty pačali nazyvać boŭłami.

Ale, viadoma, prosta pakłaści roznyja kampanienty ŭ misku — jašče nie značyć zrabić «pravilny» boŭł. Lepš, kab prysutničali ŭsie nazvanyja inhredyjenty:

  • niejkija celnazbožžavyja krupy, što adkazvajuć za pavolnyja vuhlavody;
  • babovyja, jajki, niatłustaje miasa, ptuška, ryba abo morapradukty jak białkovy składnik;
  • arechi, avakada, siemački, alivy i maśliny, aliŭkavy alej — krynica tłustych kisłot amieha-3;
  • harodnina, sadavina i zielanina — vitaminy i klatčatka.

Voś try idei dla boŭłaŭ, jakija mohuć stać karysnymi abiedziennymi ssabojkami.

Boŭł z kurycaj i žoŭtym rysam

  • 50 h rysu basmaci
  • 100 h kurynaj hrudki
  • 30 h syru kamambier
  • 5 h aliŭkavaha aleju
  • 1 ahurok
  • 1/2 morkvy
  • 5 h kunžutu
  • śpiecyi

U kastruli sa źlohku padsolenaj vadoj advarycie rys pavodle instrukcyi. Padčas varki dadajcie čajnuju łyžku kurkumy i ŭsio staranna źmiašajcie — takaja apracoŭka pieratvoryć rys z markotnaha dadatku da abiedu ŭ soniečny žoŭty. Kurycu vymyjcie, narežcie kubikami i abkačajcie ŭ lubimych śpiecyjach (naprykład, u sumiesi soli, piercu i sałodkaj papryki). Razahrejcie alej u patelni i absmažcie papiarednie zvaranuju kurynuju hrudku. Narežcie syr kamambier na kavałački, a ahurok i morkvu — jak sałomku. Pakładzicie ŭ misku zvarany rys, smažanuju kurycu, syr i harodninu. Usio heta pasypcie kunžutam.

Boŭł z łasosiem i piečanaj bulbaj

  • 100 h łasosia
  • 60 h macareły
  • 140 h bulby
  • 1 pamidor
  • 4 sparžy
  • žmienia rukały
  • 10 h aliŭkavaha aleju
  • śpiecyi

Łasosia vymyjcie, zrežcie skurku i pasypcie śpiecyjami (naprykład, sałodkaj paprykaj, sollu i piercam), a zatym zaharnicie ŭ aluminijevuju folhu. Bulbu pamyjcie, narežcie kavałačkami i pakładzicie ŭ misku — dadajcie aliŭkavy alej i lubyja śpiecyi (naprykład, dla bulby), staranna źmiašajcie i vykładzicie na blachu, zasłanuju papieraj dla vypiečki. Sparžu vymyjcie, adłamajcie ćviordyja kancy i vykładzicie na blachu — zapiakajcie ŭsio heta kala 25 chvilin pry 220 hradusach. Pa zakančeńni hetaha času dadajcie łasosia i zapiakajcie jašče 15 chvilin pry 180 hradusach. Tym časam padrychtujcie pamidory: vymyjcie i narežcie ich kubikami, a macarełu narežcie łustačkami. Pakładzicie ŭ misku pa žmieni rukały, pamidoraŭ, macareły i zapiečanaj sparžy, bulby i łasosia.

Boŭł z fałafielem i «bulbaj fry» z batatu

  • 100 h batatu (1/2 št.)
  • 50 h fałafielu
  • 10 h aliŭkavaha aleju
  • 1 pamidor
  • 1 ahurok
  • 2 stałovyja łyžki kukuruzy
  • 1/2 kabačka
  • śpiecyi

Vy možacie pryhatavać fałafiel samastojna abo kupić hatovy.

Batat vymyjcie, ačyścicie i narežcie jak na bulbu fry. Narežcie kabačok łustačkami. Vysypcie bulbu fry i łustački kabačka ŭ misku, dadajcie aliŭkavy alej i śpiecyi (naprykład, sol, pierac, sałodkuju papryku, hranulavany časnok), usio staranna źmiašajcie i vykładzicie na blachu, zasłanuju papieraj dla vypiečki. Vypiakajcie kala 25 chvilin pry 220 hradusach. Pa zakančeńni hetaha času dadajcie fałafiel i źlohku apyrskajcie ich aliŭkavym alejem. Vypiakajcie jašče 15 chvilin pry 180 hradusach. Tym časam pryhatujcie dabaŭki: pamidor narežcie kubikami, ahurok — pałoskami. Pakładzicie ŭ misku kukuruzu, narezanuju harodninu i zapiečanyja fałafiel, batat i kabačok.

Bolš receptaŭ:

Fałafiel: vy dumajecie, što heta składana — ani!

Što pryhatavać? Faršyravanyja kabački — sytnaje i duchmianaje haračaje

Stronha, faršyravanaja bułhuram, z harodninaj i miatnym johurtam

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?