Razmova pra treci padjezd u domie №47 pa Ihumienskim trakcie.

«Chočam nadać ahałosku našaj prablemie. Płanavaŭsia ramont pieršaha paviercha. A zrabili ŭvieś padjezd, nie paviedamiŭšy pra heta žycharam. Nie ŭzhadniŭšy ni sumu, ni kaštarys», — źviarnulisia minčuki ŭ redakcyju Onlíner.

Hetaja historyja pačałasia jašče ŭ lutym, kali adbyŭsia pieršy schod z udziełam pradstaŭnikoŭ ŽKH Leninskaha rajona. Pavodle słoŭ žycharoŭ, na toj sustrečy abmiarkoŭvaŭsia ramont tolki pieršaha paviercha. Ahavorvałasia, što treba było b zamianić padłohavuju plitku i śviacilni, pafarbavać ścieny. Ale ŭsio pajšło pa inšym scenary. Bieź lišnich tłumačeńniaŭ budaŭniki pačali pracy na ŭsich pavierchach. «Ale tak nie damaŭlalisia!» — aburylisia žychary i pačali telefanavać pa instancyjach.

U vyniku «kaśmietyka» ŭsiaho padjezda abyšłasia žycharam Łošycy ŭ 11 261 rubiel. Hetuju ličbu padzialili na ŭsich ułaśnikaŭ žylla: z kvatery atrymałasia kala 400 rubloŭ, suma zaležyć ad mietražu (1 mietr kvadratny — 5,31 biełaruskaha rubla).

— Za što takija hrošy? — zadajecca pytańniem Uładzimir, adzin z žycharoŭ doma. — Pa kaštarysie — usio jakasna, pa sutnaści —pamazali farbaj pa starym płaście…

Havorka pra afarboŭku ścien, stoli i parenčaŭ na leśvičnych pralotach ź pieršaha da dziaviataha paviercha. Zamiena plitki na pieršym paviersie ŭ hetyja 11 tysiač nie ŭvachodzić. Jana jak była raskołataja, tak i zastałasia.

Zatym pačałasia čarada supiarečlivych padziej. Pavodle słoŭ žycharoŭ, 15 maja adbyłasia sustreča z pradstaŭnikami zakazčyka i padradčyka. Na joj abmiarkoŭvałasia, što ŭłaśniki kvater apłaciać ramont tolki pieršaha paviercha, suma pa kaštarysie — 2451 rubiel. Ale nieŭzabavie žycharam abviaścili: płacim za ŭsie pavierchi. Dalej — zamknionaje koła. Minčuki nastojvajuć na svaim: pieršapačatkova abmiarkoŭvaŭsia ramont tolki pieršaha paviercha. Dy i da chodu budaŭničych rabot jość pytańni.

— Defiektnaha akta na ramont usiaho padjezda my nie bačyli. Damovy z nami nie zaklučali. Kaštarys pakazali tolki na stadyi zakančeńnia ramontu. Ani koleru farby, ani vybaru materyjałaŭ z nami nie ŭzhadnili, — kažuć žychary.

Onlíner źviarnuŭsia ŭ ŽKH Leninskaha rajona Minska pa kamientar, ale atrymać jaho apieratyŭna nie ŭdałosia. Kali budzie adkaz, jaho apublikujuć.

U liście, jaki pryjšoŭ ad Minskaj haradskoj žyllovaj haspadarki ŭ adkaz na zvarot žycharoŭ, havorycca, što z ulikam faktyčnaha stanu miescaŭ ahulnaha karystańnia padjezd №3 u žyłym domie №47 Pa Ihumienskim trakcie (u poŭnym abjomie) uklučany ŭ prahramu biahučaha ramontu ŽKH Leninskaha rajona na I kvartał 2023 hoda. Dalej cytata: «Za parušeńni ŭ arhanizacyi ramontu (nienaležnaje infarmavańnie, nieabhruntavanaje pamianšeńnie zapłanavanych abjomaŭ rabot, niezaklučeńnie damovaŭ z ułaśnikami i najmalnikami žyłych pamiaškańniaŭ na vykanańnie biahučaha ramontu) inžynier HP ŽEU 4, jaki prysutničaŭ na schodzie 9.02.2023, depremiravany pa vynikach pracy za červień 2023 hoda. Pryciahnuć da adkaznaści inžyniera vytvorčaha adździeła KUP «ŽKH Leninskaha rajona», jaki taksama prysutničaŭ padčas dadzienaha schodu, nie ŭjaŭlajecca mahčymym z pryčyny skasavańnia ź im pracoŭnych adnosin. Adnačasova paviedamlajem, što žycharami nazvanaha padjezda infarmacyja ab atrymańni zhody prostaj bolšaści na vykanańnie rabot pa kładcy plitki ŭ HP ŽEU 4 nie pradastaŭlena».

— Atrymlivajecca, što za ramont padjezda z majoj kvatery treba zapłacić 450 rubloŭ. Hrošy nie maleńkija. Tak ja pracuju, a dla pažyłych ludziej hetaja suma — šok, — kaža adna z žycharak padjezda.

A što kaža zakon?

Ramont u padjeździe praviaduć, kali jon uklučany ŭ hadavy płan ramontaŭ žyłoha fondu. Pra heta rabotniki ŽEU pavinny paviedamić žycharam da 1 lutaha biahučaha hoda. Śpiecyjalisty abaviazany ahučyć infarmacyju ab płanie rabot, ich košcie, terminach, źviestki ab słužbovaj asobie ŽEU, jakaja moža adkazać na pytańni, jakija ŭźnikajuć. A taksama nazvać datu i miesca praviadzieńnia ahulnaha schodu. Na im, jak praviła, abmiarkoŭvajuć pieralik i jakaść materyjałaŭ dla ramontu, vybirajuć pradstaŭnikoŭ ad žycharoŭ dla pryjomki rabot, a taksama vyrašajuć pytańnie ab zaklučeńni damovy na akazańnie pasłuh pa ramoncie.

Płanavy ramont budzie zrobleny, navat kali ŭsie žychary abo častka ź ich admovilisia zaklučyć damovy na jaho praviadzieńnie. Treba ŭličyć, što biahučy ramont zaličvajecca da asnoŭnych žyllova-kamunalnych pasłuh. A takija akazvajucca ŭ abaviazkovym paradku. Admovicca ad ich apłaty niamožna (č.1 p. 5 art. 29, p. 2 art. 30 VK). Tamu płacić buduć žychary ŭsich kvater u padjeździe, navat kali jany nie padpisvali damovy na ramont. Suma raźličvajecca praparcyjna ahulnaj płoščy kožnaj kvatery i ŭklučajecca ŭ rachunak. Pakolki, jak pakazana vyšej, biahučy ramont zaličvajecca da asnoŭnych žyllova-kamunalnych pasłuh, to lubyja sprečki ŭ hetym pytańni rehulujucca Zakonam Respubliki Biełaruś ad 16.07.2008 №405-Z «Ab abaronie pravoŭ spažyŭcoŭ žyllova-kamunalnych pasłuh».

Клас
2
Панылы сорам
7
Ха-ха
3
Ого
0
Сумна
2
Абуральна
21