Prychilniki vajskovaj chunty z rasijskim ściaham. Nijamiej, stalica Nihiera, 6 žniŭnia. AP Photo / Sam Mednick

Prychilniki vajskovaj chunty z rasijskim ściaham. Nijamiej, stalica Nihiera, 6 žniŭnia. AP Photo / Sam Mednick

Prezidenty Ekanamičnaj supolnaści zachodnieafrykanskich krain ECOWAS, jakuju padtrymlivajuć ZŠA, Vialikabrytanija i Jeŭrasajuz, damovilisia «jak maha chutčej» pravieści vajennuju apieracyju ŭ Nihiery suprać prarasijskaj chunty, jakaja zachapiła ŭładu ŭ krainie. 

Pra heta francuzskamu ahienctvu AFP paviedamiŭ prezident Kot-dJIvuara Ałasan Uatara paśla zakančeńnia samitu ECOWAS.

Pavodle jaho słoŭ, interviencyju moža spynić tolki «nieadkładnaja kapitulacyja chunty», a sam błok krain Zachodniaj Afryki «poŭny rašučaści» vyzvalić prezidenta Nihiera Machamieda Bazuma, jakoha putčysty ŭtrymlivajuć u pałonie z momantu niadaŭniaha vajskovaha pieravarotu ŭ krainie.

«Krainy Zachodniaj Afryki dali zialonaje śviatło na jak maha bolš chutkaje adnaŭleńnie kanstytucyjnaha ładu ŭ Nihiery šlacham vajennaj apieracyi, u jakoj aproč sałdat Bienina, Nihieryi dy inšych moža ŭziać udzieł zvyš tysiačy vajskoŭcaŭ Kot-dJIvuara», — zajaviŭ Ałasan Uatara ahienctvu AFP.

ECOWAS pry hetym jašče aficyjna nie abjaŭlała ab pryniatym rašeńni datyčna apieracyi suprać putčystaŭ, adnak termin ultymatumu z boku arhanizacyi skončyŭsia jašče ŭ pačatku hetaha tydnia, a sam błok zachodnieafrykanskich krain užo daŭ zahad ab razhortvańni vajskovych reziervaŭ na miažy ź Nihieram, jakija mohuć być zadziejničanyja ŭ budučaj interviencyi.

U dadatak da hetaha ZŠA i Francyja ŭžo publična padtrymali lubyja mahčymyja rašeńni ECOWAS, pryniatyja na samicie 10 žniŭnia, uklučajučy i praviadzieńnie vajennaj apieracyi.

Infarmacyja prezidenta Kot-dJIvuara, krainy-čalca ECOWAS, pakazvaje, što ŭ najbližejšy čas u Zachodniaj Afrycy moža pačacca poŭnamaštabnaja vajna, bo prarasijskaja chunta Nihiera maje sajuźnikaŭ u asobie takich ža samaabvieščanych vajskovych chuntaŭ u susiednich Mali, Burkina-Faso i Hviniei, jakija ŭžo zajavili ab padtrymcy putčystaŭ Nihiera.

Rasijanie nie škadujuć hrošaj na podkup miascovych siłavikoŭ, a taksama vykarystoŭvajuć niezadavolenaść upłyvami Zachadu i kryŭdy za kałanijalnaje minułaje. Dla hetych kryŭdaŭ jość padstavy, ale varta adznačyć, što dla afrykanskich narodaŭ usio skončyłasia lepš, čym dla narodaŭ Sibiry, jakija zaznali rasijskuju kałanizacyju.

Suadnosiny sił u Zachodniaj Afrycy na fonie kryzisu ŭ Nihiery: čyrvonym koleram paznačany sam Nihier i jaho sajuźniki ŭ rehijonie (usie jany raniej byli čalcami ECOWAS, pakul u ich nie adbylisia vajskovyja pieravaroty), a šerym — usie astatnija krainy ECOWAS, jakija vystupajuć suprać prarasijskaj chunty ŭ Nihiery. Fota: Pavan Kulkarni / Peoples Dispatch

Suadnosiny sił u Zachodniaj Afrycy na fonie kryzisu ŭ Nihiery: čyrvonym koleram paznačany sam Nihier i jaho sajuźniki ŭ rehijonie (usie jany raniej byli čalcami ECOWAS, pakul u ich nie adbylisia vajskovyja pieravaroty), a šerym — usie astatnija krainy ECOWAS, jakija vystupajuć suprać prarasijskaj chunty ŭ Nihiery. Fota: Pavan Kulkarni / Peoples Dispatch

Kali ž kanflikt sapraŭdy adbudziecca, to pryblizny raskład sił nastupny.

  • U hety momant błok ECOWAS składajecca z 11-ci krain (biez uliku Nihiera, Mali, Hviniei i Burkina-Faso, jakija prypynili členstva ŭ arhanizacyi praź pieravaroty). Usie 11 krain u sukupnaści majuć u rasparadžeńni kala 236 tysiač vajskoŭcaŭ rehularnaj armii, bolš za pałovu jakich składajuć sałdaty Nihieryi (143 tysiačy). Heta značyć, rola Nihieryi ŭ mahčymaj apieracyi budzie klučavoj. Pavodle infarmacyi zachodnich miedyja, ECOWAS płanavała adpravić u Nihier vajskovy kantynhient kolkaściu 25 tysiač čałaviek.
  • U toj ža čas kolkaść vajskoŭcaŭ Nihiera składaje krychu bolš za 5 tysiač čałaviek, a jaho sajuźniki Mali, Burkina-Faso i Hvinieja majuć ahułam amal 42 tysiačy sałdat, jakija nie fakt, što vykanajuć svajo abiacańnie pryjści na dapamohu putčystam albo adpraviać tolki častku svaich sił. 
  • Taksama varta ŭličvać, što ŭ rehijonie aktyŭna dziejničajuć najmity PVK «Vahnier». Doŭhaterminovaja zadača Rasii — padarvać pazicyi Zachadu i zachapić kantrol nad pryrodnymi resursami. Rasijanie ŭ hetym pytańni zrabili staŭku na «Vahnier». U vypadku interviencyi ŭ Nihier vahnieraŭcy niesumnienna nie zastanucca ŭbaku, udzielničajučy ŭ kanflikcie na roznych uzroŭniach. Usiaho kolkaść rasijskich najmitaŭ u rehijonie pa roznych padlikach składaje ad niekalkich socień da niekalkich tysiač čałaviek.
  • Sam Zachad pry hetym hatovy padtrymlivać krainy ECOWAS u ich apieracyi ŭ Nihiery. I choć ni ZŠA, ni Francyja, chutčej za ŭsio, nie buduć niepasredna ŭdzielničać u interviencyi, ale jany buduć dapamahać raźvieddanymi, finansami, zbrojaj.

Pašpart z emblemaj ECOWAS — Ekanamičnaj supolnaści zachodnieafrykanskich dziaržaŭ, jakaja ciesna źviazanaja z ZŠA, Brytanijaj i Francyjaj. Fota: Ecowas.int

Pašpart z emblemaj ECOWAS — Ekanamičnaj supolnaści zachodnieafrykanskich dziaržaŭ, jakaja ciesna źviazanaja z ZŠA, Brytanijaj i Francyjaj. Fota: Ecowas.int

Vyniki ž budučaj interviencyi mohuć być roznymi ŭ zaležnaści ad abranaj krainami ECOWAS stratehii. Heta moža być albo poŭnamaštabnaje ŭvarvańnie, albo abmiežavanaja vajennaja apieracyja z pryciahnieńniem śpiecnaza, albo padtrymka partyzanskich sił u Nihiery, jakija ŭžo abviaścili ab baraćbie za adnaŭleńnie demakratyi ŭ krainie. 

U jakaści mahčymych nastupstvaŭ hetaha kryzisu možna razhladać niekalki varyjantaŭ.

  • Interviencyja ŭ krainu moža vyklikać novuju chvalu afrykanskich uciekačoŭ, jakija adpraviacca ŭ Jeŭropu i znoŭ stanuć dla jaje surjoznym vyprabavańniem, asabliva padčas vajny va Ukrainie.
  • Kali vajna ŭ Nihiery zaciahniecca i zakranie značna bolš krain, to heta abaviazkova adabjecca na suśvietnych cenach na enierhanośbity, charčavańnie, a taksama na karysnyja vykapni i asabliva redkaziamielnyja resursy, jakija jość važnym elemientam u vysokatechnałahičnaj vytvorčaści.
  • U vypadku ž pośpiechu ECOWAS «Vahnier» moža być całkam abo častkova vyhnany z Afryki, što budzie aznačać surjoznuju parazu Rasii.
  • Kali ž situacyja ŭ Nihiery, naadvarot, vyrašycca na karyść Rasii, heta moža destabilizavać astatnija krainy ECOWAS i spravakavać u ich antyzachodnija pieravaroty. 

Čytajcie taksama:

Chunta Nihiera zajaviła, što Francyja niepasredna atakavała armiju krainy

Zrynuty prezident Nihiera: Uvieś rehijon moža padpaści pad upłyŭ Rasii i PVK «Vahnier»

«Pierad nami siadzieli ludzi, jakija nienavidziać ukraincaŭ». Były pasoł Ukrainy pra pieramovy na pačatku vajny, strach biełarusaŭ, ministra Makieja i fienomien Łukašenki

Клас
20
Панылы сорам
3
Ха-ха
3
Ого
11
Сумна
4
Абуральна
8

Chočaš padzialicca važnaj infarmacyjaj ananimna i kanfidencyjna?