Natalla Fiłonava. Fota: OVD-Info

Natalla Fiłonava. Fota: OVD-Info

Kastryčnicki sud Ułan-Ude (Buracija) asudziŭ 61-hadovuju Natallu Fiłonavu da 2 hadoŭ i 10 miesiacaŭ kałonii ahulnaha režymu za «prymianieńnie hvałtu» ŭ dačynieńni da čatyroch siłavikoŭ (č. 1 art. 318 KK RF). Z ulikam času, jaki Fiłonava praviała pad chatnim aryštam i ŭ SIZA, termin źniavoleńnia ŭ kałonii składzie adzin hod i piać miesiacaŭ, piša Bi-bi-si.

Abvinavačańnie patrabavała prysudzić Fiłonavaj try hady pazbaŭleńnia voli.

Piensijanierka nie pryznała viny. Jaje advakaty płanujuć abskardzić abvinavaŭčy prysud.

Palicejskija Andrej Łapcieŭ, Artur Symbiełaŭ, Siarhiej Ramanaŭ i Ajur Danzanaŭ, na jakich nibyta napała Fiłonava, na abviaščeńnie prysudu nie pryjšli.

Raniej supracoŭniki palicyi śćviardžali, što piensijanierka pry zatrymańni ich biła, drapała, adnamu z palicejskich jana trapiła asadkaj u tvar, a druhomu nibyta złamała palec.

Asudžanaja na amal try hady kałonii Natalla Fiłonava, siadajučy ŭ aŭtazak paśla suda, pracytavała radki Kandracija Rylejeva: «No hdie, skaži, kohda była. Biez žiertv iskuplena svoboda?» (z paemy «Nalivajka» pra kiraŭnika kazackaha paŭstańnia ŭ 1595 hodzie na Biełarusi Sieviaryna Nalivajku).

Natalla Fiłonava była zatrymanaja ŭ vieraśni 2022 hoda va Ułan-Ude na akcyi pratestu suprać mabilizacyi. Paśla zatrymańnia ŭ jaje doma praviali pieratrus, padčas jakoha Fiłonava nibyta ŭdaryła adnaho z palicejskich šarykavaj ručkaj. Pa viersii śledstva, piensijanierka taksama «napała» na palicejskich, kali jaje vieźli ŭ sud.

Ź listapada minułaha hoda Fiłonava znachodziłasia ŭ SIZA, a jaje pryjomnaha syna, 16-hadovaha Uładzimira Ałałykina, u jakoha jość invalidnaść, orhany apieki zabrali ŭ dziciačy dom u vioscy Barhuzin za 250 kiłamietraŭ ad Ułan-Ude. Svajakam Fiłonavaj zabrać jaje pryjomnaha syna ź dziciačaha doma nie dazvolili. U sakaviku padletka nie adpuścili ź dziciačaha doma na sudovaje pasiadžeńnie da pryjomnaj maci.

Pravaabaronca Nadzieja Nizoŭkina raniej paviedamlała, što ŭ dziciačym domie pryjomnaha syna Natalli Fiłonavaj źbivajuć i ckujuć.

U mai minułaha hoda sud aryštavaŭ Fiłonavu na 5 sutak za drobnaje chulihanstva — jana źviarnułasia z prośbaj da kiroŭcy źniać z aŭtobusa znak Z, paśla čaho kiroŭca dastaviŭ jaje ŭ palicejski ŭčastak.

Клас
1
Панылы сорам
3
Ха-ха
0
Ого
0
Сумна
1
Абуральна
12