Aryhinalnaje videa z kamientarom «Da čaho Łukašenka Biełaruś davioŭ» apublikavaŭ rasijski «patryjatyčny» karystalnik pad nikam Dajanat. U im jon pakazaŭ, jak pracuje krama biez pradaŭcoŭ i kas, raźmieščanaja kala hipiermarkieta OMA ŭ minskim rajonie Brylevičy. 

Kruhłasutačnaja krama znachodzicca niepasredna na terytoryi elektrazaradnaj stancyi Malanka. Supierchutki zaradny kompleks z 8 stancyjami i aŭtanomnaj kramaj adkryŭsia ŭ śniežni 2022 hoda.

Pryncyp pracy takoj kramy davoli prosty: karystalnik rehistrujecca ŭ mabilnaj prahramie, pryviazvaje kartu, na ŭvachodzie skanuje QR, biare tavary z palicy i vychodzić z kramy. Praz paru chvilin hrošy za nabytki śpisvajucca z karty. U hetaj kramie nie tolki niama pradaŭcoŭ i kas, u joj nie treba skanavać navat štrychkody, vašaja pakupka raźličvajecca z kolkaści tavaru, jaki vy ŭziali, vystaŭlenaha na palicach z čujnikami vahi. 

Uvachod u kramu Malanka Shop. Fota: Anłajnier

Uvachod u kramu Malanka Shop. Fota: Anłajnier

Technałahičnaść kramy vyklikała zachapleńnie ŭ inšych rasijskich «patryjatyčnych» błohieraŭ, dla jakich heta ŭ navinku.

Praź ich videa padchapili jeŭrapiejskija antyzachodniki. Asabliva šmat retvitaŭ rabiłasia ź Sierbii, značnaja častka nasielnictva jakoj padtrymlivaje Rasiju ŭ vajnie z Ukrainaj, bačačy ŭ hetym supraćstajańnie NATA, na čyje bambardziroŭki jany jašče nie zabylisia.

Biełarusy ž u repłajach aburalisia tym, što źjaŭleńnie kramy pryvatnaj kampanii prypisvajecca Łukašenku, i źviartali ŭvahu na toje, što techničny prahres nie moža padmianić svabodu, jakoj u krainie niama. 

Rasijskija Z-błohiery i jeŭrapiejskija antyzachodniki ščylna źviazanyja z ultrapravymi ŭ ZŠA, siarod jakich šmat prychilnikaŭ antymihranckich zakonaŭ, a taksama nieprychavanych marhinałaŭ i rasistaŭ. Tamu nie vypadkova, što kali niechta zrabiŭ anhlijskija subcitry da videa, jano z novaj mocaj razyšłosia pa amierykanskim siehmiencie. 

Hetaje videa, pieraapublikavanaje ŭltrapravym błohieram Janam Majłzam Čonham, jaki maje małazijskaje pachodžańnie, nabrała ŭžo zvyš 850 tysiač prahladaŭ. Błohier i jahonyja padpisčyki padzivilisia vysokamu ŭzroŭniu davieru ŭ biełaruskim hramadstvie.

U ZŠA, pieradusim u vialikich ahłamieracyjach, isnuje vialikaja prablema z kradziažom tavaraŭ, rabunkami kramaŭ i vandalizmam, za jakija nichto pa vyniku nie niasie adkaznaści. «Jak doŭha hetaja krama praisnuje ŭ San-Francyska?» — pytalisia tvitarčuki sa Štataŭ. 

Pakolki značnaja častka złačyncaŭ u ZŠA — heta ciemnaskuryja ludzi, jakija na praciahu stahodździaŭ byli dyskryminavanaj častkaj amierykanskaha hramadstva, to mnohija kamientatary z rasisckaha punktu hledžańnia tłumačyli sakret biełaruskaha ŭzajemadavieru: «Biełaruś amal na 100% biełaja», «u Biełarusi niama čarnaskurych», «biełaje hramadstva».

Nasamreč nijakaj zaležnaści ad koleru skury ŭ hetym pytańni niama. Vialikaja kolkaść niabiełych mihrantaŭ i ichnich naščadkaŭ u krainach Jeŭropy nijak nie ŭpłyvaje na isnavańnie kram takoha typu — u Jeŭropie ich šmat. Vysoki ŭzrovień złačynnaści pry vysokim siarednim uzroŭni žyćcia zastajecca ŭnikalnaj rysaj ZŠA. 

Pieršyja kramy biez pradaŭcoŭ źjavilisia jašče niekalki dziasiatkaŭ hadoŭ tamu ŭ Narviehii, Šviecyi dy Isłandyi. Ich adkryvali ŭ nievialikich miastečkach, dzie ŭsie žychary viedajuć adno adnaho, a turystaŭ amal niama. Prodaž byŭ zasnavany na čystym daviery: ludzi brali patrebny tavar i pakidali hrošy. U hety čas uładalnik moh zajmacca svajoj haspadarkaj. 

U kancy 2010-ch kramy biez pradaŭcoŭ, dziakujučy raźvićciu technałohij, masava pryjšli i ŭ vialikija harady Jeŭropy. Nasamreč pra davier kazać užo nie davodzicca, bo prasunutaja sistema videanazirańnia i analityka prosta nie pakidajuć mahčymaściaŭ biespakarana skraści tavar. 

Čytajcie taksama:

15-siekundnaje videa ź minskaha mietro šakavała amierykancaŭ. Tvit ź im sabraŭ 5 miljonaŭ prahladaŭ

Niezvyčajnuju kramu z kaviarniaj ad «Kamunarki» adkryjuć u HC «Stalica»

U Vilni adkryłasia pieršaja ŭ Jeŭropie krama, dzie možna biaspłatna ŭziać pradukty

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?