Mirča Śniehur. Fota: newsmaker.md

Mirča Śniehur. Fota: newsmaker.md

Pozna viečaram 13 vieraśnia ad nievylečnaj chvaroby pamior pieršy prezident Małdovy Mirča Śniehur, piša newsmaker.md.

Śniehur naradziŭsia 17 studzienia 1940 hoda ŭ siale Tryfeniešć Sarokskaha pavieta. Pa śpiecyjalnaści byŭ ahranomam, atrymaŭ stupień doktara sielskahaspadarčych navuk.

Pracavaŭ ahranomam, staršynioj kałhasa, zajmaŭ pasady dyrektara ekśpierymientalnaj stancyi pa palavych kulturach, načalnika Hałoŭnaha ŭpraŭleńnia sielskahaspadarčych navuk Minsielhascharča i h. d.

Z 1985 hoda da 1989 hoda byŭ sakratar Centralnaha Kamiteta Kampartyi Małdovy. U 1989—1990 hh. byŭ staršynioj Prezidyuma Viarchoŭnaha Savieta MSSR i staršynioj Viarchoŭnaha Savieta MSSR.

Z 3 vieraśnia 1990 hoda da studzienia 1997 hoda zajmaŭ pasadu prezidenta Małdovy.

Padčas žnivieńskaha putču 1991 hoda nie vykanaŭ patrabavańniaŭ HKČP, a padtrymaŭ Barysa Jelcyna.

Taksama na pieryjad jaho kiravańnia pryjšoŭsia kanflikt u Prydniastroŭi. Śniehur byŭ žorstkim prychilnikam likvidacyi samaabvieščanaj aŭtanomii Prydniastroŭja, što ŭ vyniku vyliłasia ŭ Prydniastroŭski kanflikt.

Za čas prezidenckaha praŭleńnia Mirčy Śniehura niezaležnaść Małdovy ŭ karotki termin pryznali bolš za 130 krain. Małdova stała siabram AAN i bolš jak 40 inšych mižnarodnych struktur. Ale na pieryjad jaho kiravańnia pryjšoŭsia mocny ekanamičny kryzis, u krainie ŭ hety čas pačaŭsia spad vytvorčaści, zakryvalisia pradpryjemstvy, vyrasła emihracyja z krainy.

Padčas vybaraŭ prezidenta ŭ 1996 hodzie Mirča Śniehur u pieršym tury atrymaŭ adnosnuju bolšaść hałasoŭ (38,7 %). Piatro Łučynski nabraŭ 27,7% hałasoŭ. Adnak u druhim tury Łučynski, padtrymany levymi i centrysckimi siłami, nabraŭ bolš hałasoŭ (54,02 %), čym Śniehur (45,98 %).

Клас
0
Панылы сорам
1
Ха-ха
0
Ого
0
Сумна
9
Абуральна
1