Kab stvaryć zapaminalny imidž, mała kupić modnaje adzieńnie — treba, kab jano raspaviadała historyju pra čałavieka, padkreślivała mocnyja baki i advodziła pozirk ad taho, što jon žadaje schavać. Biazdumnaje farmiravańnie harderobu časta viadzie da advarotnaha — niapravilna padabranyja rečy pieratvarajuć unikalnyja asablivaści asoby ŭ niedachopy. Tak adbyłosia i z Ryhoram Azaronkam: siońnia bieź pierabolšańnia jaho možna nazvać samym drenna apranutym viadučym na praŭładnym telebačańni.

Čamu Ryhoru nie iduć kaściumy

Pryhažość — nie efiemiernaje paniaćcie. Instynktyŭna ludziam padabajucca vobrazy, jakija vyhladajuć jak naturalnaja i zładžanaja sistema, dzie ŭsio harmanična: hołas adpaviadaje źniešnaści, adzieńnie — charaktaru. Kali niechta sprabuje naciahnuć kamplekt, jaki nie adpaviadaje jaho kulturnamu i emacyjnamu dośviedu, u nas źjaŭlajecca adčuvańnie padvojnaha dna: byccam čałaviek nadzieŭ masku i žadaje vydać siabie za kahości inšaha. Heta pałochaje i adšturchoŭvaje. 

Azaronak

Skrynšot videa STB

Dysanans asabistaha bekhraŭndu i adzieńnia vydatna bačny na prykładzie Ryhora Azaronka. Prapahandysta nielha papraknuć u intelihientnaści. Błytanaja havorka i biedny słoŭnikavy zapas pakazvajuć uzrovień jaho adukavanaści, a ahresiŭnaść i niaŭmieńnie pracavać ź intanacyjami — ahulnaj kultury. Tamu, nadziavajučy kłasičny harnitur — svojeasablivuju ŭniformu «rabotnikaŭ intelektualnaj śfiery», — jon pieratvarajecca nie ŭ tonkaha dziełavoha čałavieka, a ŭ bułhakaŭskaha Šarykava. 

Viadoŭca sprabuje znajści svoj styl. Pra heta śviedčać modnyja ekśpierymienty, jakich u jaho było niamała: akramia kłasiki, Ryhor nasiŭ i spartovyja łuki, i trendavy kežuał, ale hetyja kamplekty patrabavali dapracoŭki. Mnohija rečy byli prykmietna małyja i mieli patrebu ŭ padhoncy pa fihury.

Azaronak

Fota: instahram Azaronka. Źleva — spartovy vobraz, sprava — novaja kasavarotka

Zrešty, dośvied z kasavarotkaj narešcie akazaŭsia ŭdałym. Kašula, jakaja pieražyła druhoje naradžeńnie ŭ časy rańniaha SSSR, pasuje žurnalistu jak druhaja skura. Čamu ž hetaja reč da tvaru Ryhoru?

Kali ideja supadaje ź vizualnym prajaŭleńniem

U 1930-ch hadach byłaja impierskaja raskoša kančatkova sastupiła miesca novaj modzie — praletarskaj. Ścipłyja kasavarotki, bryzientavyja štany i parusinavyja tufli akazalisia asnovaj mužčynskaha harderobu.

Moładź 1930-ch

Moładź 1930-ch

Zrešty, zachaplacca znaročystaj prastatoj było nie składana: admova ad NEPa, čarhovy maratoryj na volny handal i ahulnaja razrucha ŭ pramysłovaści mocna adbilisia na asartymiencie, dastupnym zvyčajnym hramadzianam. A žorny Vialikaha teroru, jakija pačali raskručvacca ŭ tyja časy, vučyli ludziej vystaŭlać napakaz hałoŭnaje — adsutnaść buržuaznych karanioŭ. Tak, na niekatory čas, kasavarotka stała rečču, jakaja nie tolki zaścierahała nośbita ad kasych pozirkaŭ tavaryšaŭ-balšavikoŭ, ale i padkreślivała łajalnaść da idei kłasavaj baraćby.

kasavarotka

Moładź 1930-ch

Vidavočna, dumka supraćborstva z kapitalistyčnym hramadstvam emacyjna blizkaja Azaronku. Tamu, u adroźnieńnie ad kłasičnych kaściumaŭ, kasavarotka źjaŭlajecca vydatnaj dekaracyjaj jaho «manifiestaŭ», jakija zaklikajuć da admovy ad «miaščanskich pieražytkaŭ» i baraćby ź siarednim kłasam.

Azaronak

Fota: instahram Azaronka

Imidžavaja adsyłka da 1930-ch vielmi dakładnaja — mietady, jakimi dziaržava buduje biełaruski postkapitalizm siońnia, šmat u čym padobnyja da tych, jakimi karystalisia ŭ časy rańniaha SSSR. Vobraz praletaryja, jaki vybiŭsia da rupara, možna nazvać tvaram sučasnaj ajčynnaj prapahandy.

Čytajcie taksama:

Ryhor Azaronak budzie vykładać u Połackim dziaržaŭnym univiersitecie

Zatrymali chłopca, jaki napisaŭ u tvitary «fu, sa mnoj u trenažorcy Azaronak». Toj pryjšoŭ da zatrymanaha ŭ HUBAZiK, kab pahłumicca

Palitołah raskazaŭ, chto i kali spynić Azaronka i Mukavozčyka

Клас
13
Панылы сорам
16
Ха-ха
72
Ого
6
Сумна
6
Абуральна
21

Chočaš padzialicca važnaj infarmacyjaj ananimna i kanfidencyjna?