Centr biełaruskaj salidarnaści (CBS) u Varšavie — adna z samych viadomych struktur u Polščy, čyja dziejnaść nakiravanaja na dapamohu biełarusam i ŭkraincam, jakija byli vymušanyja źjechać sa svaich krain.
CBS maje partnioraŭ pačynajučy ad Ministerstva zamiežnych spraŭ Polščy i ŭładaŭ Varšavy i zakančvajučy šmatlikimi arhanizacyjami i fondami z roznych krain. Hrošy na finansavańnie svajoj dziejnaści Centr atrymlivaje praz hranty na asobnyja prajekty. Taksama luby achvotny moža padtrymać jaho hrašovym pieravodam.
Sutnaść spravy
30 kastryčnika ŭ telehram-kanale Wywiad Cywilny, jaki na polskaj movie publikuje teksty prakramloŭskaj nakiravanaści, źjaviłasia kopija dakumienta (invojs, ci pa-polsku «faktura») na apłatu kansultacyjnych pasłuh z boku CBS polskaj budaŭničaj firmie Budimex.
Tam ža śćviardžałasia, što praz padtrymku biełaruskaj inicyjatyvy kampanija zmahła atrymać padrad na budaŭnictva płota na biełaruskaj miažy.
Falšyvaja faktura. Fota: Reform.by
Praz try dni post byŭ «znojdzieny» kanałam «Žiołtyje ślivy» i za niekalki hadzin razyšoŭsia pa telehram-kanałach bolšaści łukašenkaŭskich prapahandystaŭ. A zatym jaho pieradrukavali asobnyja psieŭdaapazicyjnyja kanały, kštałtu OŠS.
Što nie tak z «dakumientam»
Jak patłumačyli redakcyi Reform.by u CBS, hety dakumient jość falšyŭkaj. Pra heta śviedčać šerah niedakładnaściaŭ.
Hałoŭnaja ź ich — heta toje, što CBS jak niekamiercyjnaja arhanizacyja nie maje prava zajmacca kamiercyjnaj dziejnaściu, a tym bolš naličvać PDV.
Akramia hetaha, dakumient maje šerah pamyłak: u adrasie elektronnaj pošty, rachunku i ŭ napisańni imieni i proźvišča staršyni praŭleńnia («prezesa») Uładzimira Kobieca.
Kamu heta patrebna
U intervju Reform.by staršynia praŭleńnia CBS Uładzimir Kobiec zajaviŭ, što jon asabista ni z kim z kampanii Budimex nie znajomy, i ni jon asabista, ni źviazanyja ź im arhanizacyi nikoli nie atrymlivali hrošaj ad hetaj kampanii.
Kobiec zaŭvažyŭ, što publikacyja dakumienta chutčej raźličana na biełaruskuju aŭdytoryju, kab dyskredytavać u jaje vačach demakratyčnuju apazicyju i niepasredna CBS, — u spadziavańni na toje, što nichto nie budzie raźbiracca ŭ jaho sapraŭdnaści.
Staršynia praŭleńnia CBS ličyć, što karani hetaj ataki treba šukać u biełaruskich śpiecsłužbach. U samoj Polščy, na jaho dumku, hety fejk nie budzie mieć praciahu.
Čytajcie jašče:
