Jak stvarałasia čaraŭnictva, dzie dastać takija minijaciurnyja fihurki i ŭ kolki abyšłasia samaja darahaja ź ich — stvaralnik vitryny Kirył Janulevič raskryŭ «Vićbičam» historyju stvareńnia kaladnaha haradka.

Usie fota: «Vićbičy»

Usie fota: «Vićbičy»

Ubačyŭšy adnojčy ŭ Minsku nievialikuju navahodniuju instalacyju, Kirył nie moh ad jaje adarvacca, začaravana razhladaŭ i zdymaŭ na kamieru. Pierahladajučy fatahrafii doma, abaviazkova zachacieŭ sabie takuju, kab možna było lubavacca ŭ luby čas i, što hałoŭnaje, užyvuju. 

Maleńki haradok paŭtaraje samyja lubimyja i viadomyja sceny z «Hary Potera»: tut možna znajści znajomyja tvary mnohich piersanažaŭ i nie tolki. Voś začaravanaja mašyna mistera Uiźli zatrymałasia na vysokim halinastym drevie, a voś Chahryd z małym Hary na latalny matacykle, niepadalok na ŭsiu moc idzie bitva čaraŭnikoŭ z łordam Vołan-de-Mortam, a naviersie Poter namotvaje piruety na miatle ŭ kvidzič u pahoni za załatym śnitčam.

Kirył pačaŭ rabić nakidy makietaŭ dla navahodniaj vitryny letam.

— Ja ŭsio prydumlaŭ sam. Siadaŭ viečarami, braŭ sšytak, ałovak — mnie važna było namalavać hetuju vitrynu ŭ hałavie, kab ja jaje bačyŭ i razumieŭ, jak heta ŭsio budzie vyhladać. Na heta syšła kuča listoŭ i viečaroŭ. Pavoli pačało niešta vymaloŭvacca. Na žal, niekatoryja momanty prosta nie ŭleźli — ja rabiŭ sam pole dla kvidziča z papiery, hliny i kučy inšych pradmietaŭ, razmaloŭvaŭ, ale jano nie źmiaściłasia. Ja padumaŭ, što jość scenki cikaviejšyja, i hetaje pole ciapier staić u mianie doma, čakaje svajho času — mahčyma, kali-niebudź i vystaŭlu jaho.

Historyju Hary Potera temaj dla svajoj ekspazicyi Kirył Janulevič vybraŭ nie vypadkova — jon ščyra ličyć siabie fanatam čaraŭnika sa šnaram u vyhladzie małanki i lubić sieryju filmaŭ pra jaho. Praktyčna kožny hod małady čałaviek pierahladaje ich z žonkaj ci sam. Hary Poter — heta pra śviatočny nastroj i ciopłyja momanty, jakija kranajuć i sahravajuć dušu doŭhimi i chałodnymi zimovymi viečarami.

— Kab haradok sapraŭdy ažyŭ, zaśviaciŭsia, zamihaŭ i zahučaŭ, my pastaralisia z maim dobrym siabram Andrejem — jon vialiki majstar u haspadarčych spravach — i rabotnikami kramy. Andrej dapamoh ustalavać śpiecyjalnyja lampy i śviatłodyjodnyja stužki, usio heta złučyŭ u adnu vialikuju liniju i padklučyŭ, za što jamu vialiki dziakuj, — raspaviadaje Kirył Janulevič. — Ciapier u vitrynie źjavilisia kałonki, ź jakich razdajucca kaladnyja pieśni, i nievialiki ekran źvierchu, dzie tranślujucca sceny z «Hary Potera».

Fihurki dla ŭvasableńnia svaich idej znajści akazałasia dastatkova ciažka. Samaje raspaŭsiudžanaje miesca dla pošuku — markietpłejsy. Tam za minijaciury navat davodziłasia zmahacca — ich zanadta chutka raźbirali. Niekatoryja fihurki Kirył kuplaŭ u stalicy, a niejkija zamaŭlaŭ navat u Jeŭropie, adkul ich jamu pryvozili znajomyja.

Ceny na takoje zadavalnieńnie roznyja. Na viadomym markietpłejsie možna znajści fihurku za 30-120 biełaruskich rubloŭ u zaležnaści ad zapatrabavanaści hieroja, a za jeŭrapiejskuju pryjdziecca vykłaści ad 50 da 70 dalaraŭ. 3D-druk samy niedarahi — za štučku moža vyjści i 20, i navat 10 rubloŭ.

— U asnoŭnym fihurki mnie drukavaŭ na 3D-pryntary ipešnik Alaksandr z Baranavičaŭ. Ja znajšoŭ jaho ŭ internecie, i my źviazalisia ź im letam. Patłumačyŭ jamu svaju zadumku, a jon pakazaŭ mnie makiety, jakija moža zrabić. Jamu spatrebiŭsia čas da kanca vosieni, tamu što praca była nie ź lohkich. Adzin tolki zamak Chohvarts jon pačaŭ drukavać letam i skončyŭ u kastryčniku, a mnie ŭžo treba było farbavać hety zamak i dadavać jaho ŭ ekspazicyju, — dzielicca Kirył.

Darečy, zamak Chohvarts — samaja darahaja minijaciura ŭ kalekcyi — abyšoŭsia bolš čym u 1500 rubloŭ. Jechać za im pryjšłosia ŭ inšy horad.

Majstar padzialiŭsia nievialikimi chitraściami, jakija spatrebiacca tym, chto zacikaviŭsia jaho spravaj i zachacieŭ paŭtaryć.

— Kali chtości pahladzić na mianie i budzie zajmacca stvareńniem kaladnych viosak i haradkoŭ, ja budu vielmi rady. Zaŭsiody pryjemna natchniać, być šturškom dla pačatku niejkaj spravy. Ja b paraiŭ prystupać da vybaru i kupli fihurak z pačatku hoda, kali śviaty ŭžo prajšli, i mnohija kramy zrabili źnižki, tamu što ceny pad Novy hod na minijaciury i instalacyi ŭźlatajuć da niabiosaŭ. Ja sam vielmi časta karystajusia hetym łajfchaki. Lepš dačakacca kanca hetaha hoda i pačatku nastupnaha, pajści ŭ kramu ci zaleźci na markietpłejs i paradavać siabie fihurkami, zekanomiŭšy kala 40-50% biudžetu. A ŭ novym hodzie ŭžo budzie bolš času ŭsio pradumać. Taksama treba zakupicca pienapłastam, abaviazkovy termanož — kab nie było šmat brudu i śmiećcia, — prykmiačaje Kirył Janulevič. — I pačynać treba ź nievialikich instalacyj, pavoli nabyvajučy biascenny vopyt.

Čytajcie taksama:

«Kot prymaje vyrab za sapraŭdnuju ptušku i pačynaje palavać». Ajcišnica ŭ volny ad asnoŭnaj pracy čas stvaraje ŭpryhožańni nievierahodnaj pryhažości

Ci vyjduć apošnija detektyvy Roŭlinh i Nieśbio pa-biełarusku?

Denieł Redklif zdymaje dakumientalny film pra svajho dublora, jaki paciarpieŭ padčas zdymak «Hary Potera»

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?