Fota: Hienštab USU

Fota: Hienštab USU

Akramia taho, pa słovach adnaho jeŭrapiejskaha dypłamata, niadaŭnija chvali rasijskich rakietnych napadaŭ zabrali dziasiatki žyćciaŭ u Kijevie i inšych haradach, pakolki ŭkrainskaja supraćpavietranaja abarona, jakaja ŭ značnaj stupieni hruntujecca na darahich pierachopnikach, dadzienych sajuźnikami, nie zmahła źniščyć stolki rakiet, kolki ich było ŭ minułym.

Publična ŭkrainskija aficyjnyja asoby zajaŭlajuć, što jany praciahnuć baraćbu suprać rasijskich siłaŭ, navat kali padtrymka sajuźnikaŭ nie pastupić. Ale dla «aktyŭnaj abarony» Ukraina budzie mieć patrebu ŭ pastajannych pastaŭkach artyleryjskich snaradaŭ i inšych bojeprypasaŭ, jakimi sajuźniki sprabujuć zabiaśpiečyć ukraincaŭ z usich sił.

Pa słovach dypłamataŭ, jeŭrapiejskija sajuźniki nie zmohuć pastavić 1 młn artyleryjskich snaradaŭ, što jany abiacali zrabić da 1 sakavika, pieradaŭšy pakul kala 600 tysiač na fonie pastajannych zatrymak u vytvorčaści i kłopataŭ nakont spustašeńnia zapasaŭ.

Ministry abarony, jakija sustrenucca ŭ Brusieli na hetym tydni, mohuć pasprabavać padličyć inšyja pastaŭki, kab pavialičyć ahulnuju kolkaść, ale ŭsio adno nie dasiahnuć mety ŭ 1 miljon, jakaja była pastaŭlena letaś, havorać dypłamaty.

Hetyja vykliki zjaŭlajucca ŭ toj čas, kali ŭkrainskaje kamandavańnie zaviaršaje raspracoŭku płanaŭ utrymańnia 600-milnaj linii frontu ŭ hetym hodzie, šukajučy słabyja miescy ŭ rasijskaj abaronie, ale nie sprabujučy zrabić surjozny praryŭ paśla taho, jak letašni kontrnastup nie mieŭ vialikich pośpiechaŭ, adznačaje vydańnie.

Pa słovach zachodnich dypłamataŭ, napružanaść u adnosinach pamiž prezidentam Uładzimiram Zialenskim i jaho hałoŭnakamandujučym Valeryjem Załužnym uzrasła, pakolki na linii frontu nazirajecca stahnacyja, dadaje Bloomberg.

Razam z tym, pa słovach zachodnich čynoŭnikaŭ, rasijskija vojski zanadta źniasilenyja, kab dasiahnuć značnych pośpiechaŭ, kali tolki ŭkrainskaja abarona nie pacierpić krach. Ale i tady Kramlu, vierahodna, daviadziecca mabilizavać bolš ludziej, kab zamacavać pośpiechi, što jon pakul robić nieachvotna.

U Vašynhtonie pakiet dapamohi Biełaha doma ŭ pamiery 60 miljardaŭ dołaraŭ ZŠA ŭžo niekalki miesiacaŭ znachodzicca ŭ tupiku. Bieź jaho ŭsio, čaho dasiahnuli ŭkraincy, «budzie pad pahrozaj», vykazaŭ mierkavańnie dziaržsakratar ZŠA Entani Blinkien u paniadziełak na pres-kanfierencyi razam z hiensiekam NATA Jensam Stołtenbierham.

Lidary Jeŭrapiejskaha sajuza źbiarucca 1 lutaha na ekstranny samit, kab pasprabavać pieraadoleć supraciŭ urada Vienhryi pa vydzialeńni dapamohi Ukrainie ŭ pamiery 50 miljardaŭ jeŭra. Tak ci inakš, ES maje namier uchvalić dapamohu da kanca lutaha, zajaviŭ jeŭrapiejski čynoŭnik.

«Navat kali dapamoha ad ES pastupić, niedachop amierykanskaj padtrymki ŭkrainskija vojski adčujuć na poli boju ŭžo ŭ naprykancy viasny», — cytuje Bloomberg zachodnich dypłamataŭ.

Pa słovach zachodniaha čynoŭnika, za apošnija miesiacy Kijeŭ stvaryŭ peŭnyja reziervy klučavych bojeprypasaŭ sajuźnikaŭ, kab zabiaśpiečyć svaje vojski, ale hetaha niedastatkova, kab kampiensavać deficyt artyleryjskich snaradaŭ.

Rasija maje namier atrymać kala 4,5 miljonaŭ snaradaŭ ad ułasnaj vytvorčaści i pastavak z Paŭnočnaj Karei. I choć bolš sučasnyja haŭbicy i abstalavańnie dla naviadzieńnia na celi va ŭkrainskich vojskaŭ nie patrabujuć stolki snaradaŭ, kab nanieści takija ž straty, hetuju roźnicu nie pieraadoleć całkam.

Na dumku ministra abarony Estonii Channa Pieŭkura, bajavyja dziejańni mohuć zacichnuć na praciahu nastupnych niekalkich miesiacaŭ, nastupalnyja dziejańni adnoviacca ŭ traŭni i červieni, kali padsochnie ziamla. Pavodle jaho słoŭ, mienavita tady stanie zrazumiełym los dapamohi ES i ZŠA.

«Kali my nie znojdziem rašeńnie da taho času, to Ukrainie budzie nadzvyčaj ciažka ŭtrymać svaje pazicyi», — papiaredziŭ estonski ministr.

Čytajcie taksama:

Zachodnija miedyja ličać, što zvalnieńnie Załužnaha — pytańnie času, i aceńvajuć ryzyki

Ukraina ŭžo siońnia moža atrymać ad ZŠA vysokadakładnyja kiravanyja bomby GLSDB — Politico

Va Ukrainie raspaŭsiudžvałasia supiarečlivaja infarmacyja pra adstaŭku Załužnaha. Pakul, zdajecca, jon zastajecca

Клас
1
Панылы сорам
3
Ха-ха
1
Ого
1
Сумна
5
Абуральна
18