Sa studzienia raspaŭsiud u Biełarusi nasvaju, śniusu dy inšych žavalnych i niuchalnych preparataŭ z dadatkam tytuniu, vapny ci inšaj nietabačnaj syraviny zabaroniena, paviedamlaje «Ježiednievnik».
Ministerstva ŭnutranych spravaŭ užo daŭno sprabavała abmiežavać raspaŭsiud na terytoryi krainy nasvaja. Milicyja pravodziła rejdy na rynkach, kanfiskoŭvała bujnyja partyi tavaru, a potym zmušanaja było viartać jaho ŭładalnikam. Zahvazdka była ŭ tym, što choć miedyki i pryznavali ŭžyvańnie nasvaju škodnym dla zdaroŭja, ale preparat nie byŭ uklučany ŭ respublikanski pieralik narkatyčnych srodkaŭ.
Adnak urešcie MUS znajšło sposab abmiežavać raspaŭsiud na terytoryi Biełarusi nasvaju. Mienavita milicyja pryniała aktyŭny ŭdzieł u raspracoŭcy Dekretu prezidenta №11, jaki nabyŭ moc z 1 studzienia 2010 hoda.
Rašeńniem prezidenta nasvaj byŭ adniesieny da niepalilnych tytuniovych vyrabaŭ, jakija ŭ svaju čarhu padviali pad dziejańnie Dekretu prezidenta Respubliki Biełaruś ad 17 śniežnia 2002 hoda №28 «Pra dziaržaŭnaje rehulavańnie vytvorčaści, zvarotu i spažyvańni tytuniovaj syraviny i tytuniovych vyrabaŭ».
Pavodle dakumienta, vytvorčaść i zvarot niepalilnych tytuniovych vyrabaŭ, pryznačanych dla smaktańnia, vyrablenych z tytuniu, vapny dy inšaj nietabačnaj syraviny abo častkova ci całkam vyrablenych z vyčyščanaha tytuniovaha pyłu i (ci) drobnaj frakcyi rezanaha tytuniu z dadatkam ci biez dadatku nietabačnaj syraviny i inšych inhredyjentaŭ, z 1 studzienia 2010 hoda zabaroniena.
Pry hetym ni nasvaj, ni śnius aficyjna nie adniesieny da narkatyčnych ci psichatropnych rečyvaŭ. Heta značyć, što parušeńnie dekretu prezidenta ciahnie za saboj nie kryminalnuju, a administracyjnuju adkaznaść za niezakonny handal ci niezakonnuju vytvorčaść.
