Ministerstva sielskaj haspadarki i charčavańnia Biełarusi i Ministerstva sielskaj haspadarki Hruzii padpišuć pahadnieńnie ab ekanamičnym i navukova‑techničnym supracoŭnictvie ŭ halinie ahrapramysłovaha kompleksu.
Adpaviednaje rašeńnie źmiaščajecca ŭ pastanovie Savieta Ministraŭ Biełarusi numar 1725.
Jak raskazali ŭ hałoŭnym upraŭleńni źniešnieekanamičnaj dziejnaści Minsielhascharča Biełarusi, padpisańnie pahadnieńnia zapłanavana na kaniec studzienia — pačatak lutaha biahučaha hoda ŭ čas vizitu delehacyi Minsielhascharča Biełarusi na čale ź ministram sielskaj haspadarki i charčavańnia Siamionam Šapiram u Hruziju. Płanujecca, što ŭ skład biełaruskaj delehacyi ŭvojduć kiraŭniki bujnych sielskahaspadarčych pradpryjemstvaŭ respubliki.
U chodzie pierahavoraŭ baki vyznačać asnoŭnyja napramki supracoŭnictva ŭ ahrapramysłovym kompleksie, razhledziać pierśpiektyvy raźvićcia handlu pradukcyjaj APK pamiž dźviuma krainami, asobnaja ŭvaha budzie ŭdzielena pytańniu pastavak biełaruskaj sielhastechniki ŭ Hruziju. «Na abmierkavańnie budzie vyniesieny taksama prajekt pa stvareńniu sumiesnaj biełaruska‑hruzinskaj praduktovaj kampanii», — dadali ŭ Minsielhascharčy. Akramia hetaha, śpiecyjalisty dźviuch krain majuć namier abmierkavać najbolš pierśpiektyŭnyja śfiery partniorstva ŭ halinie sielekcyi i plemiannoj raboty ŭ žyviołahadoŭli.
