Kamunisty Pieciarburhu i Leninhradskaj vobłaści zaklikajuć vydać mižnarodny order na aryšt režysiora Džejmsa Kemierana. Pra heta paviedamlaje aficyjny sajt kamunistaŭ.
Kamunisty zajaŭlajuć, što płanieta Pandora, što ŭ stužcy «Avatar», «była adkrytaja i palitaja kryvioju savieckich kasmanaŭtaŭ. U Struhackich kamunary zasvojvali niepakornuju Pandoru dla dabra čałaviectva, realizujučy mary K.Marksa i F.Enhielsa. Kemieran skraŭ z anałaŭ savieckaj fantastyki dziasiatki vobrazaŭ nasielnikaŭ Pandory, samu atmaśfieru płaniety, narešcie, jejnyja kaardynaty ŭ Suśviecie i pasłaŭ u kosmas zuchavataha desantnika — zabojcu i pryhniatalnika Iraka, Juhasłavii, Afhanistana, Haici i Samali».
Picierskija kamunisty prajaŭlajuć nadzvyčajnuju pilnaść u traktoŭcy šamanskich vobrazaŭ. «Bijołah-nacyst Sihurni Uiver jaskrava demanstruje mety amierykanskaj miedyčnaj reformy, što pravodzicca administracyjaj Abamy… Vieniesueła zachoplena, Čavies zabity, ordy «džy-aj» vyrvalisia pa-za miežy Soniečnaj sistemy».
«Usich nas Kemieran prahnie adpravić na płanietu monstraŭ i paśla zachapić bahaćci Sibiry, — padsumoŭvaje sakratarka Kiraŭskaha rajonnaha kamitetu Luboŭ Kałašnicyna. — Miesca Kemierana — na narach u turmie.»
Dva hady tamu picierskija kamunisty patrabavali bajkatavać film pra Indyjanu Džonsa. A ŭ 2009 hodzie abvinavacili Kreml u katavańni ŭviaźnienych inšapłanietnikaŭ: pasłancam z Alfa Centaŭry, maŭlaŭ, nie dajuć čytać tvory Marksa i Lenina.
Pra reakcyju Kemierana i Interpoła na apošniuju zajavu kamunistaŭ nie paviedamlajecca.