Volha i Dzianis Ivašyny ŭ Vilni. Fota: fejsbuk Volhi Ivašyna
Dzianisa Ivašyna zatrymali 12 sakavika 2021 hoda supracoŭniki KDB nibyta za ŭmiašańnie ŭ dziejnaść milicyi i spačatku abvinavacili pavodle art. 365 Kryminalnaha kodeksa. Da poźniaj nočy ŭ kvatery žurnalista siłaviki pravodzili pieratrus. Taksama ŭ toj viečar vobšuk zrabili doma ŭ maci Dzianisa, a 15 sakavika pryjšli z vobšukam da jaho 95-hadovaj babuli.
Dzianis byŭ redaktaram-vałancioram biełaruskaj viersii sajta mižnarodnaj rasśledavalnaj supolnaści InformNapalm z 2014 hoda, a taksama pazaštatnym karespandentam u haziecie «Novy čas» z 2018-ha, zrabiŭ niekalki rasśledavańniaŭ, u tym liku pra pierachod byłych ukrainskich bierkutaŭcaŭ u siłavyja struktury Biełarusi.
U siaredzinie sakavika 2022 pravaabaroncam stała viadoma, što KDB taksama abvinavačvaje Ivašyna ŭ supracoŭnictvie z ukrainskaj raźviedkaj.
U siaredzinie červienia 2022 hoda spravu Dzianisa pieradali ŭ sud. 15 žniŭnia ŭ Hrodzienskim abłasnym sudzie ŭ zakrytym režymie raspačaŭsia razhlad spravy žurnalista.
14 vieraśnia 2022 hoda sudździa Valeryj Ramanoŭski pryznaŭ Dzianisa Ivašyna vinavatym pavodle art. 365 (umiašańnie ŭ dziejnaść supracoŭnika ŭnutranych spraŭ) i č. 1 art. 356 Kryminalnaha kodeksa (zdrada dziaržavie) i asudziŭ jaho da 13 hadoŭ i 1 miesiaca kałonii va ŭmovach uzmocnienaha režymu.
Viarchoŭny sud 20 śniežnia 2022 h. razhladzieŭ apielacyjnuju skarhu palitźniavolenaha žurnalista. Prysud pakinuli bieź źmienaŭ, a skarhu — biez zadavalnieńnia.
17 studzienia 2023 hoda palitviaźnia etapavali ŭ mahiloŭskuju PK № 15. Jon prybyŭ u kałoniju z vysokaj tempieraturaj i adrazu trapiŭ u špital. 10 lutaha stała viadoma, što Dzianisa pieraviali z balnicy ŭ atrad.
Zhodna z daviedkaj z suda, Ivašyna asudzili pavodle dvuch artykułaŭ Kryminalnaha kodeksa: č. 1 art. 356 (zdrada dziaržavie) i art. 179 (niezakonny zbor abo raspaŭsiud dadzienych ab asabistym žyćci). Kali i ź jakoj pryčyny adbyłasia zamiena ci pierakvalifikacyja abvinavačańnia, nieviadoma.
U kancy lutaha 2023 h. Dzianisa pieraviali ŭ turmu №1, a ŭ sakaviku pieraviali nazad u mahiloŭskuju PK №15. Tam jaho abmiežavali dźviuma «atavarkami» zamiest naležnych piaci.
Naprykancy červienia 2023 hoda žurnalista pieraviali na turemny režym u Žodzina. Žonka palitviaźnia Volha adznačała, što pra sud pa źmienie režymu ani svajaki, ani advakat nie viedali. Ciapier jon znachodzicca ŭ žodzinskaj turmie №8 na strohim režymie.
Volha ŭčora napisała ŭ svaim fejsbuku:
«Nabližajecca treciaja hadavina zachopu ŭ pałon Dzianisa Ivašyna. Amal tydzień ad jaho nie prychodziła novych listoŭ. I dahetul nie adbyłosia nivodnaha ź niby dvuch abiacanych u sakaviku telefanavańniaŭ. Biezumoŭna, našyja chvalavańni nie paraŭnajucca z pakutami svajakoŭ inšych palitviaźniaŭ, pra jakich miesiacami adsutničaje jakaja-kolviek infarmacyja. Ale naŭrad ci my ad taho staniem mienš chvalavacca za Dzianisa. My ŭžo byli śviedkami taho, jak spačatku pra palitźniavolenaha pierastavali kazać i pisać, a paźniej hramadstva raptoŭna daviedvałasia pra ichnaje zabojstva za kratami ci daviadzieńnie da śmierci praź niesvoječasovaje akazańnie mieddapamohi».
Čytajcie taksama:
Abjavili zbor na nadmahilny pomnik pamierłamu za kratami Iharu Ledniku
Žychara Łuninca asudzili da siami hadoŭ kałonii pa šerahu pratesnych artykułaŭ
Były palitviazień Andrej Kudzik nie vyjšaŭ na volu paśla «sutak» — kryminałka
