Hramadskaje abjadnańnie «Biełaruskaje dobraachvotnaje tavarystva achovy pomnikaŭ historyi i kultury» źviarnułasia ŭ Hienprakuraturu z prośbaj pryciahnuć da kryminalnaj adkaznaści vinavatych u źniščeńni pomnika architektury 3-j katehoryi na Kleččynie.
Tak vyhladaŭ śviran u Janavičach. Fota Kastusia Šastoŭskaha.
Były kaścioł ŭ Klecku, azdobleny kupałam-cybulinaj. Fota church.by
Havorka viadziecca pra draŭlany śviran XIX st. siadziby z v. Janavičy, jaki ŭ 2008 hodzie puścili na drovy.
U zvarocie adznačajecca, što papiarednija zajavy ŭ nižejšyja instancyi nie dali plonu. Ni prakuratura Kleckaha rajona, ni prakuratura Minskaj vobłaści nie znajšli składu złačynstva ŭ dziejańniach kiraŭnictva RUP «Minsk-Kryštal SPF «Tuča» i Čyrvonazorkaŭskaha sielskaha savieta, pa čyjoj inicyjatyvie i byŭ razabrany śviran. Miž inšym, pieraličanyja vyšej asoby spasłalisia na toje, što… prosta nie viedali pra status historyka-kulturnaj kaštoŭnaści, jaki mieŭ budynak śvirna.
Takim čynam była parušanaja asnoŭnaja norma kryminalnaha prava, jakaja nie vyzvalaje ad adkaznaści za ździejśnienaje pravaparušeńnie pa pryčynie niaviedańnia zakanadaŭstva, piša ŭ zvarocie A. Astapovič.
Varta adznačyć, što padobny los mieŭ zvarot u pravaachoŭnyja orhany Kleckaha rajonu i abłasnuju prakuraturu nakont źmieny źniešniaha vyhladu pomnika 1-j katehoryi — budynku byłoha daminikanskaha kaścioła 17 st. u Klecku. Vosieńniu 2008 hoda na dachu byłoha kaścioła pa inicyjatyvie nastajaciela kleckaha pravasłaŭnaha prychodu a. Matfieja Biełavusa źjaviŭsia kupał-cybulina. Ministerstva kultury nakiravała tady ŭ Klecki rajvykankam aficyjny list, u jakim paviedamlałasia, što dziejańni a. Matfieja piarečyć zakanadaŭstvu, bo jany pryviali da źmieny źniešniaha vyhladu pomnika.
