Čym eks-kryminalnik Janukovič i ściarvoznaja Jula lepšyja? Piša Barys Tumar.

Viktar Juščanka, idał i pakutnik Aranžavaj revalucyi, zastajecca papularnym u Biełarusi. Navat Łukašenka jaho pa-svojmu pavažaŭ i pavažaje, pra što nie raz, ad 2004 hoda pačynajučy, zajaŭlaŭ publična. I biełarusam trochi dziŭna, čaho hetaha simpatyčnaha, ludskaha čałavieka vybarcy prakinuli.

Čym eks-kryminalnik Janukovič i «ściarvoznaja Jula» lepšyja? Dla naziralnikaŭ z-za miažy roźnica nievialikaja. Ale dla ludziej, udumanych va ŭkrainskuju palityku, jana vyraznaja. A va ŭmovach svabody ŚMI ŭ palitycy ŭdumany ŭsie.

Rasija naviazvaje dumku, što Juščanku adkinuli, bo jon byŭ zanadta nacyjanalistyčny. Unutry Ukrainy takoje dumki nie pačuješ.

Ukraincam nadakučyła mieć spravu z prezidentam słabym, jaki nie ŭmieje naviazvać svaju volu pry patrebie i kułakom.

A dabiła Juščanku jahonaja anhažavanaść u chaŭrusy aliharchaŭ. I jahony syn, jak i ŭsie dzietki ŭkrainskaj palityčnaj elity, jeździć na mašynie koštam 200 tys. dalaraŭ, nosić mabilnik koštam 5 tys. dalaraŭ. Za jakija šyšy?

Ni Cimašenka, ni Janukovič nie biadniejšyja. I nie sumleńniejšyja ŭ sensie rezidencyj i adziožak ot kuciur. Ale Juščanka zacisnuła miž dźviaryma.

Pierachodnaje hramadstva prymaje kuślivych idealistaŭ — jak Havał, Kačynski ci Adamkus. Prymaje i cyničnych prahmatykaŭ, jak Łukašenka, Kvaśnieŭski ci Varonin. Ale niama miesca na Alimpie palityku słabomu, kampramisnamu. Idealist nie moža być troški zakłapočanym svaim kašalkom.

Los Juščanki — navučka j tym biełaruskim stoikam, jakija kaliści źmieniać Łukašenku.

Što da Juščanki, dyk tut naprošvajecca paraŭnańnie ź Jelcynym. U 1996 hodzie Jelcyn byŭ taki sama niepapularny ŭ Rasii, jak sioleta — Juščanka va Ukrainie. Jelcyn pajšoŭ na falsifikacyju vybaraŭ, manipulacyi ŚMI i palityčnymi apanientami i va ŭładzie zastaŭsia. U vyniku Rasija saskočyła ź jeŭrapiejskaha šlachu. Juščanka dziejničaŭ sumleńniej. Ludzi majuć zvyčku ciaplej stavicca da kiraŭnikoŭ minułaha, čym da niadaŭnich lideraŭ. Napeŭna, u budučyni Juščanku jany taksama pačnuć usprymać pazityŭniej. Jak užo siońnia pazityŭniej staviacca da eks-prezidenta Kučmy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?