Były kiraŭnik vatykanskaj dypłamatyi kardynał Akile Silviestryni vykazaŭ upeŭnienaść, što zahad zabić Jana Paŭła II ŭ 1981 h. pastupiŭ z Uschoda: z KDB ci inšaj niejkaj savieckaj arhanizacyi, piša polski Newsweek.
«Prynamsi, my tak miarkujem», — raspavieŭ jon ahienctvu Ansa za dva dni pierad vychadam z turmy ŭ Turcyi Ali Ahdžy, jaki ździejśniŭ toj zamach.
U paniadziełak, 18 studzienia, skončyŭsia termin źniavoleńnia Ahdžy za zabojstva tureckaha žurnalista. Da 2000 hoda jon, z prysudam pažyćciovaha źniavoleńnia za sprobu zabić Papu, adbyvaŭ termin u italjanskaj turmie. Zatym byŭ pamiłavany prezidentam Karła Adzelijo Čampi i pieradadzieny tureckamu boku. Z tych časoŭ jon adbyvaŭ pakarańnie pad Ankaroj.
Kardynał Silviestryni, adzin z najbližejšych paplečnikaŭ Jana Paŭła II, zaznačyŭ: «Było vidavočna, što kali b tady Vajtyła akazaŭsia zabitym, to razam sa śmierciu kardynała Stefana Vyšyńskaha prablema Polščy i jaje imknieńnia da niezaležnaści dramatyčna skončałasia b».
Jon taksama padkreśliŭ, što ŭ Vatykanie nikoli nie dumali pra isłamski śled zamachu, i heta niahledziačy na toje, što ŭ 1979 hodzie Ali Ahdža publična pahražaŭ śmierciu Papu pierad jahonaj pilihrymkaj u Turcyju.