Na pracesie 15 studzienia Džordž Dzideryku Prynsłu (Prinsloo George Diederik) admoviŭsia ad svaich pakazańniaŭ, dadzienych u chodzie papiaredniaha rasśledavańnia. Sud pieraniesieny.
Prynsłu śćviardžaje, što pakazańni ź jaho vybivali.
«Mnie pryhrazili, što kali ja nie budu kazać tak, jak mnie kažuć, to mianie abvinavaciać u teraryźmie, zhvałtavańni, a taksama rabavańni inšaha banka», — pierakazvaje skazanyja na sudzie słovy Prynsłu baranavickaja hazieta «Intex-press».
Jon taksama zajaviŭ, što nibyta pisaŭ dźvie skarhi ŭ prakuraturu na dziejańni milicyi, ale nie atrymaŭ na ich adkazu. «Paśla hetaha, u listapadzie ja napisaŭ list na 25 arkušach prezidentu Biełarusi Łukašenku, kab jon va ŭsim razabraŭsia», — skazaŭ Prynsłu.
Padčas sudovaha razboru Prynsłu kazaŭ zusim nie toje, što zapisana ŭ jaho pakazańniach u kryminalnaj spravie. Roźnicu ŭ pakazańniach abvinavačany patłumačyŭ nastupnym čynam:
«Mianie bili pa śpinie, sprabavali dušyć, a jašče ŭvieś čas dapytvali biez advakata i dniom, i nočču».Prynsłu admaŭlaje, što jon staranna i doŭha pradumvaŭ rabavańnie (choć u jaho z saboj u sumcy apynulisia nažnicy, kajdanki, hazavy bałončyk, šapačka i nož). Jon admoviŭsia ad pakazańniaŭ, što za dva tydni da napadu na bank kupiŭ usio heta na apošnija hrošy. «Ja pryvioz šapačku z saboj z Paŭdniova-Afrykanskaj Respubliki, — skazaŭ Prynsłu. — Heta łyžnaja šapačka sa śpiecyjalnaj proraźziu dla vačej, a składny nož zaŭsiody našu nošu z saboj, bo bajusia napadu ŭ čužoj krainie». Pistalety jon nibyta kupiŭ ŭsiaho tolki za niekalki dzion da napadu na bank, i tolki ŭ toj momant, pa jaho słovach, u jaho saśpieła ideja abrabavańnia.
Na sudzie Prinsłu zajaviŭ, što pierad tym, jak jon zajšoŭ u bank, pierad im źjaviŭsia vobraz baćki, ale heta jaho nie spyniła. «Ja byŭ nie ŭ svaim narmalnym stanie, ja byŭ nie ja», — skazaŭ abvinavačany.
Pasiadžeńnie suda pa spravie Prynsłu było adkładzienaje da 26 studzienia. Sud pastanaviŭ daručyŭ prakuroru Baranavičaŭ pravieści rasśledavańnie zajavy abvinavačanaha ab prymianieńni da jaho niedazvolenych mietadaŭ śledstva.
Varta adznačyć, što na minułym tydni «Intex-press» pisała pra toje, što ŭ Paŭdniova-Afrykanskaj Respubliki praca biełaruskaj milicyi vyklikała siensacyju.Pra heta paviedamiła karespandent vydańnia «Pretoria News» Chanty Ota, jakaja pryjechała ŭ Biełaruś z PAR, kab sačyć za sudovym pracesam. «Dla našych uładaŭ, palicyi heta byŭ šok, kali vyśvietliłasia, što Prynsłu zatrymali ŭ Respublicy Biełaruś. Heta była sapraŭdnaja siensacyja! Jaho stolki hadoŭ vyšukvała palicyja, Interpoł, a tut usiaho praź niekalki dzion paśla ździajśnieńnia złačynstvy ŭ Baranavičach, jaho znajšli!», — skazała žurnalistka. Jak śćviardžaje Chanty Ota, ciapier nasielnictva Paŭdniovaj Afryki, Aŭstralii i inšych krain vielmi cikavicca, jak prachodzić sud nad adnym z samych niebiaśpiečnych złačyncaŭ Paŭdniova-Afrykanskaj Respubliki. «Tema Prynsłu zaraz vielmi papularnaja. Heta samyja rejtynhavyja artykuły, jak u drukavanych vydańniach, tak i na sajtach», — adznačyła karespandentka «Pretoria News».
***
Nahadajem, što 10 červienia 2009 hodu hramadzianin PAR Džordž Dzideryku Prynsłu ździejśniŭ napad na adzin ź filijałaŭ «Biełarusbanku» ŭ Baranavičach. U časie napadu mužčyna ŭdaryŭ dźviuch žančyn — supracoŭnicu banku i naviednicu ŭstanovy. 38-hadovaja supracoŭnica filijału ad ŭdaru napadnika pavaliłasia na bankamat i mocna ŭdaryłasia ab jaho hałavoj. Zatrymali złačyncu, jaki znachodziŭsia na terytoryi Biełarusi biez rehistracyi, 12 červienia ŭ Minsku. Dapamoh śledstvu baranavicki chłopčyk, jaki bačyŭ rabaŭnika, kali toj vybiahaŭ z banka. Dziakujučy śviedčańniam chłopčyka byŭ składzieny jakasny fotarobat. Interpoł vyšukvaje Džordža Dzideryka Prynsłu za sieksualnyja złačynstvy suprać dziaciej. Jaho vinavaciać u zhvałtavańni dziaŭčat 11 i 15 hadoŭ, vyrabie dziciačaj parnahrafii i machlarstvie.
