Pierajmienavańnie vulicy Kamunistyčnaj u Bahasłoŭskuju kaštuje 5–7 miljonaŭ. Viciebskim uładam «ledź chapaje na vypłatu zarobkaŭ», tamu jany prapanavali vicieblanam samim apłacić praceduru pierajmienavańnia vulicy Kamunistyčnaj u Vialikuju i Małuju Bahasłoŭskuju.
Siońnia adbyłosia pasiedžańnie haradskoj tapanimičnaj kamisii Viciebska pad kiraŭnictvam Natalli Šyjanok, načalnika adździeła kultury Viciebskaha harvykankamu. Udzielničać u pasiedžańni była zaprošanaja kiraŭnička Viciebskaj abłasnoj arhanizacyi Biełaruskaj Chryścijanskaj Demakratyi Taćciana Sieviaryniec, inicyjatar kampanii pa zboru podpisaŭ žycharoŭ horadu za viartańnie ciapierašniaj vulicy Kamunistyčnaj jaje sapraŭdnaj nazvy, adniataj u 1919 hodzie. Na hetaj vulicy raźmieščany Śviata -Uśpienski chram, baciuška jakoha błasłaviŭ zbor podpisaŭ za viartańnie vulicy nazvy Vialikaja i Małaja Bahasłoŭskaja. Zajava z 31 podpisam žycharoŭ vulicy Kamunistyčnaja była padadzienaja ŭ miascovy harvykankam napačatku śniežnia.

Pavodle Taćciany Sieviaryniec, staršynia vykankamu Kastryčnickaha rajonu Viciebska zajaviŭ, što ŭ bližejšyja dva-try hady horad nie budzie zajmacca pierajmienavańniem vulic, tamu što «niama hrošaj navat na zarobki». Čynoŭnik adznačyŭ, što vykankam «ź vialikaj ciažkaściu vypłačvaje zarobki biudžetnikam».

Pierajmienavańnie vulicy, pavodle čynoŭnika, budzie kaštavać 5–7 miljonaŭ rubloŭ (zamiena techničnych pašpartoŭ damoŭ, novyja šyldy, zamiena štampaŭ u pašpartach i h.d.).

Spadaryni Sieviaryniec było zajaŭlena, što kali b hetyja raschody ŭziali na siabie žychary vulicy Kamunistyčnaja, tyja, chto padpisaŭ zajavu ab pierajmienavańni, dyk harvykankam ničoha nie mieŭ by suprać. A kali nie — dyk pakul niama mahčymaści.

Aficyjny adkaz ab razhladzie haradskoj tapanimičnaj kamisii zajavy 31 žychara Viciebska ab pierajmienavańni vulicy Kamunistyčnaj u Vialikuju i Małuju Bahasłoŭskuju i pryjantym rašeńni Taćcianie Sieviaryniec paviedamiać piśmova.

Viciebskaja arhanizacyja BCHD raspačynaje zbor srodkaŭ na pierajmienavańnie Kamunistyčnaj u Vialikuju i Małuju Bahasłoŭskuju.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?