Kala 31% vypadkaŭ aŭtamabilnych kradziažoŭ u Minsku źviazana z vykradańniem aŭtamahnitołaŭ. Takija vyniki internet‑apytańnia, jakoje było praviedziena na aficyjnym sajcie HUUS Mienharvykankama.
Jašče adzin davoli pryciahalny elemient dla złamyśnikaŭ — znački‑łahatypy. Heta paćvierdzili 25% apytanych aŭtaŭładalnikaŭ. Lusterki z aŭtamabilaŭ krali ŭ 12% respandentaŭ, a mołdynhi — u 5%. Pa 3% paciarpiełych zastalisia biez barsietak i mabilnych telefonaŭ, zabytych u mašynie. Akramia taho, 11% apytanych vybrali varyjant «inšaja majomaść».
Jak adznačajuć u HUUS, vyniki hałasavańnia całkam paćviardžajucca i realnaściu.
Štodnia ŭ Minsku ździajśniajecca kala 20‑30 kradziažoŭ z aŭtamabilaŭ.
Taksama złamyśniki zdymajuć z mašyn roznyja detali. Z pačatku hetaha hoda staličnyja aŭtaŭładalniki ŭžo nie daličylisia bolš za 200 kamplektaŭ darahich lusterkavych linz i 130 aŭmahnitołaŭ. Jak śviedčyć statystyka,
najbolšaja kolkaść takich kradziažoŭ ździajśniajecca na terytoryi Frunzienskaha i Maskoŭskaha rajonaŭ Minska.
Staličnaja milicyja rekamienduje aŭtaŭładalnikam vykonvać najpraściejšyja praviły biaśpieki.
Pa‑pieršaje, nieabchodna abstalavać aŭtamabil supraćzhonnym prystasavańniem. Adnak navat paśla hetaha mašynu lepš pakidać na achoŭnaj stajancy abo ŭ haražy.
Niadrenna taksama nanieści i supraćzhonnuju markiroŭku asnoŭnych vuzłoŭ i ahrehataŭ transpartnaha srodku.
Nie varta taksama pakidać u aŭtamašynie klučy, dakumienty, aŭmahnitołu, sumki‑torby dy inšyja kaštoŭnyja rečy. Złamyśniki mohuć raźbić škło ci paškodzić zamak, kab atrymać vašu majomaść.
Akramia taho, milicyja raić u načny čas pa čarzie dziažuryć na stajankach ŭ dvarach žyłych damoŭ. «Lepš za adnu noč u miesiac pravieści biez sna, achoŭvajučy mašyny, čym pračynacca ad kožnaha padazronaha šumu», — adznačyli ŭ HUUS.