Studentaŭ, jakija ŭdzielničali ŭ «Śviacie biełaruskaj movy» prymusili pisać tłumačalnyja zapiski nakont praviadzieńnia imprezy. Śviata sioleta ŭpieršyniu płanavałasia zładzić aficyjna i maštabna, adnak niečakana dla arhanizataraŭ, kiraŭnictva Pałaca kultury MAZ skasavała damovu.
Śviata ŭsio ž adbyłosia ŭ studenckaj aŭdytoryi, ale paśla jaho praviadzieńnia ŭ kiraŭnictva ŭniviersiteta kultury paŭstali pytańni. Arhanizatary nie vyklučajuć, što imprezaj zacikavilisia śpiecsłužby.
Śviata biełaruskaj movy anansavałasia, jak maštabnaja dzieja, što ŭpieršyniu adbudziecca na aficyjnym uzroŭni. U Pałacy kultury MAZ pavinna było prajści ŭznaharodžańnie pradstaŭnikoŭ samych roznych prafiesij, jakija štodzionna svaim prykładam sadziejničajuć raźvićciu i papularyzacyi biełaruskaj movy, a taksama kancert biełaruskich vykanaŭcaŭ. U jakaści hościa mieŭsia pryjści ministr kultury Pavał Łatuška. Kvitki pradavalisia spraŭna i zala na 700 miescaŭ miełasia być zapoŭnienaja.
Ale za dva dni da pačatku, arhanizatary raptam atrymali admovu.
«Nam prosta skazali, što kancertu nie budzie i ŭsio. Značyć, kvitki my budziem viartać», - kaža Kirył Šyk.
Mierapryjemstva ŭ terminovym paradku pieranieśli ŭ aŭdytoryju ŭniviersiteta kultury, praŭda zrabili jaho ŭ zakrytym farmacie. U suviazi z hetym adzin z arhanizataraŭ — kampanija «Budźma biełarusami» admoviłasia ad dalejšaha ŭdziełu ŭ akcyi. Kaardynatar kampanii Nina Šydłoŭskaja paličyła hetuju situacyju dziŭnaj i niedarečnaj.
«Ad maštabnaha mierapryjemstva vyjhrali by ŭsie: i ŭniviersitet kultury, i Ministerstva kultury, i šyrokaja hramadskaść. Tym bolš, što dzień rodnaj movy śviatkujecca va ŭsich krainach śvietu. Heta by ŭźniała prestyž našych dziaržaŭnych i navučalnych ustanoŭ. Tamu na našu dumku farmat byŭ abrany nie zusim pravilny. Vierahodna, što heta pieraściaroha samoha ŭniviersiteta z toj nahody, što ŭ padobnym mierapryjemstvie ŭdzielničaje niejkaja niedziaržaŭnaja kampanija», - kaža N. Šydłoŭskaja.
Ministr Łatuška ŭsio ž naviedaŭ mierapryjemstva razam z kiraŭnictvam univiersiteta kultury. Praŭda, jak śviedčyć adzin z udzielnikaŭ imprezy Aleh Chamienka, vysokija hości nie pramovili ni słova.
A.Chamienka: Ja źviarnuŭ uvahu, što prysutničaŭ i ministr kultury, i rektar univiersitetu. Usie čakali ad ich niejkaj pramovy ci niejkaj adznaki hetaha mierapryjemstva. Ale zala hetaha nie dačakałasia. Heta padałosia krychu dziŭnym.
P.Karaloŭ: Adkul sychodziła zabarona mierapryjemstva ja nie mahu dakładna skazać. Mahčyma, što zacikavilisia peŭnyja orhany. Na žal, u nas śviata biełaruskaj movy na šyrokim prastory adznačać krychu bajacca, bo nie viedajuć va što jano vyljecca.
Adzin z arhanizataraŭ imprezy — Pavał Karaloŭ byŭ adnym z tych,
kaho paśla praviadzieńnia Śviata biełaruskaj movy paklikali ŭ administracyju ŭniviersiteta.
P.Karaloŭ: Prasili dać tłumačalnuju nakont taho, čamu my ŭzialisia za dapamohu ŭ arhanizacyi hetaha śviata, chto dałučyŭ da śviata kampaniju «Budźma». My dali spravazdaču, što zajmajemsia śviatam biełaruskaj movy ŭžo šeść hod, a kampaniju dałučyli, bo całkam padtrymlivajem jaje mety i idei.
Arhanizatary imprezy škadujuć, što zadumanaje imi śviata było sapsavana, ale vierać, što raniej ci paźniej jany abaviazkova adznačać dzień rodnaj movy maštabna i aficyjna.
