Mahiloŭcu Jaŭhienu Andrejenku adkazali z KDB i Viciebskaha abłvykankama na zapyty pra vykazvańni viciebskaha čynoŭnika.
KDB nie znajšoŭ prykmietaŭ złačynstva.
U abłvykankamie ličać niedapuščalnymi vykazvańni čynoŭnika.
Jaŭhien Andrejenka raskazaŭ NN, što jaho mocna aburyli słovy viciebskaha čynoŭnika pra Biełaruś i biełaruskuju movu. Tamu jon vyrašyŭ pajści dalej za napisańnie kamientaroŭ na sajtach niezaležnych ŚMI i źviarnuŭsia ŭ dziaržaŭnyja orhany. Na dniach mahiloviec atrymaŭ listy z KDB i Viciebskaha abłvykankamu. Adkaz z Kamitetu za podpisam pieršaha namieśnika staršyni Viktara Viahiery pryjšoŭ pa-rasijsku.
U im havorycca, što ŭ vyniku pravierki ŭ dziejańniach Hieraščanki A.Ja. nie było znojdziena prykmietaŭ złačynstva, praduhledžanyja art. 130 «Raspalvańnie rasavaj, nacyjanalnaj, relihijnaj varožaści abo roźni».
U adroźnieńnie ad KDB, z abłvykankamu adkazali pa-biełarusku. Ale nie tolki hetym adroźnivajecca list, padpisany namieśnikam staršyni Leanidam Kavalovym. Najpierš Leanid Leanidavič padziakavaŭ Jaŭhienu Andrejenku za ŭvahu i kłopat pra biełaruskuju movu, litaraturu i kulturu.
«Što datyčyć vykazvańniaŭ Hieraščanki A.Ja., to, biezumoŭna, jany nie adpaviadajuć dziaržaŭnamu padychodu i rečaisnaści, i niedapuščalnyja z boku adkaznaj asoby. Ab hetymi adbyłasia adpaviednaja razmova z Hieraščankam A.Ja.», — havorycca ŭ liście z abłvykankamu.
Adkaz ź Viciebskaha harvykankamu Jaŭhien Andrejenka pakul nie atrymaŭ.
Nahadajem, što vykazvańni viciebskaha čynoŭnika aktyŭna abmiarkoŭvalisia na forumach sajtaŭ niezaležnych ŚMI. Nieadnojčy hučali prapanovy dać acenku jaho dziejańniam z punktu hledžańnia zakonu. Na słovy Hieraščanki vymušanyja byli reahavać ŭłady: čynoŭnik atrymaŭ vymovu pa miescy pracy, zaŭvahu jamu zrabiŭ kiraŭnik Administracyi prezidenta Uładzimir Makiej, a ŭ «Sovietskoj Biełorusii» kiraŭniku «Russkoho doma» miakka paraili nie błytać piśmieńnickaje i čynoŭnickaje.
