Palmovaju niadzielaj 2010 hoda raspačaŭsia novy etap u historyi minskaj parafii Śviatoha Jana Jevanhielista i śviatoha Maksimiljana Kolbe. 28 sakavika, u Niadzielu Muki Pana, uračystyja nabaženstvy dla viernikaŭ parafii adbyvalisia ŭ novapabudavanaj kaplicy (prykładny adras: Matusieviča, 78).
Pa słovach probašča parafii a. Alaksandra Pisaruka OFMConv, hetaja časovaja kaplica stanie «sercam duchoŭnaha žyćcia» minskaha mikararajona, jaki praciahvaje razbudoŭvacca i zasialacca pieravažna maładymi siemjami. Jak adznačajuć sami vierniki, najaŭnaść miesca malitvy niepasredna ŭ miescy žycharstva taksama dazvolić im, nie zatračvajučy času na darohu, čaściej byvać na nabaženstvach i prymać bolš aktyŭny ŭdzieł u žyćci parafii.
Ajciec Alaksandr Pisaruk OFMConv i a. Alaksandr Ułas OFMConv ščyra padziakavali viernikam i ŭsim ludziam dobraj voli, jakija malitvaj abo inšaj dapamohaj spryjali ŭźviadzieńniu kaplicy. Viadoma, novy chram — heta nie tolki budaŭničyja pracy, ale i šmat inšych pytańniaŭ, jakija vyrašalisia pastupova i z Božaj dapamohaj. Śviatary vykazali padziaku i probašču parafii Maci Božaj Budsłaŭskaj (Kamiennaja Horka), dzie z 2007 hoda prachodzili nabaženstvy dla viernikaŭ z Kuncaŭščyny i Masiukoŭščyny.