Na pracesie pa spravie vaŭkavyskich pradprymalnikaŭ śviedki masava zajaŭlajuć pra nacisk na ich z boku śledstva z metaj atrymać dokazy, jakija kampramietujuć Mikałaja Aŭtuchoviča, paviedamiŭ pravaabaronca Aleh Vołčak.
Pavodle jaho słoŭ, 29 sakavika ŭ sudzie dapytali piać śviedak. «Pradprymalnik z Oršy Ihar Puzikaŭ raskazaŭ, što ŭ 2005 hodzie sprabavaŭ pieradać Aŭtuchoviču ŭ turmu zapisku, kab atrymać zhodu na nabyćcio ŭ jaho «dźviuch‑troch adzinak aŭtatechniki». Zapisku Puzikaŭ prasiŭ pieradać znajomaha, supracoŭnika turmy Siarhieja Šnitko, ale toj admoviŭsia jaje pieradavać. Adnak, pavodle słoŭ Puzikava, śledčyja prymusili jaho skazać, što zapiska ŭ turmu ŭsio ž patrapiła. Jon pakazaŭ, što śledčyja jamu pahražali, abiacali chutkaje vyzvaleńnie, i pad naciskam jon daŭ patrebnyja śledstvu pakazańni, adnak u sudzie łhać admoviŭsia», — paviedamiŭ Vołčak.
Śviedka Šnitko ŭ sudzie naohuł zajaviŭ, što nijakaj zapiski z ruk Puzikava nie braŭ, chacia pryznaŭ, što razmova pra mahčymaść pieradačy zapiski była, adznačyŭ Vołčak.
Pavodle słoŭ pravaabaroncy, pra psichałahičny nacisk na śledstvie havaryła i śviedka Ludmiła Paremskaja, były buchhałtar firmy Aŭtuchoviča. «Jana zajaviła, što skazała b usio, što zaŭhodna, aby jaje vyzvalili», — adznačyŭ Vołčak. Jon padkreśliŭ, što Paremskaja taksama nie paćvierdziła vinu Aŭtuchoviča.
Były «afhaniec» Kanstancin Ułanaŭ raskazaŭ ab tym, jak sustrakaŭsia z Aŭtuchovičam i Alaksandram Łarynym u Minsku ŭ 2005 hodzie. Pavodle viersii śledstva, padčas hetaj sustrečy jany sačyli za namieśnikam ministra pa padatkach i zborach Vasilom Kamiankom, rychtujučy na jaho zamach. «Adnak u sudzie Ułanaŭ zajaviŭ, što nichto ni za kim nie sačyŭ. U turmie na Ułanava pačaŭsia psichałahičny nacisk, akramia taho, u śledčym izalatary jon pieranios infarkt. Advakat havaryŭ, što nielha jaho brać na śledčyja dziejańni, ale ŭsio adno jaho vazili pa miescach, dzie, pavodle słoŭ Łaryna, da ich dałučaŭsia Ułanaŭ, kali jany sačyli za Kamienkam», — raskazaŭ Vołčak.
«Abvinavačańnie rassypajecca na vačach. Usie śviedčańni, jakija śledčyja zdabyli šantažom i katavańniami, a ŭtrymańnie Ułanava ŭ SIZA ź infarktam ja liču katavańniem, na sudovym pasiadžeńni nie paćvierdzilisia. Ja nie viedaju, na što raźličvali śledčyja i daznavalniki, niaŭžo jany dumali, što śviedki ŭ sudzie pra heta nie raskažuć? Ale mianie turbuje, što hetyja dziejańni ŭčyniali supracoŭniki elitnaha padraździaleńnia pa baraćbie z arhanizavanaj złačynnaściu i karupcyjaj. Kali jany tak parušajuć zakon, to što havaryć pra śledčych z rajonnych haradoŭ i pasiołkaŭ. Usie hetyja dziejańni možna rascanić jak dyskredytacyju pravaachoŭnych orhanaŭ», — zajaviŭ Vołčak.
Pry hetym pravaabaronca jašče raz adznačyŭ, što dokazy, atrymanyja pad naciskam, nie mohuć być pakładzieny ŭ asnovu abvinavaŭčaha prysudu.
Nahadajem, u Viarchoŭnym sudzie razhladajecca kryminalnaja sprava, pa jakoj prachodziać Mikałaj Aŭtuchovič, Uładzimir Asipienka, Alaksandr Łaryn i Michaił Kazłoŭ. Pieršych troch abvinavačvajuć u padrychtoŭcy terarystyčnaha akta ŭ dačynieńni da namieśnika ministra pa padatkach i zborach Vasila Kamianko i byłoha staršyni Hrodzienskaha abłvykankama Uładzimira Saŭčanki. Aŭtuchovič i Asipienka taksama abvinavačvajucca ŭ arhanizacyi padpału doma byłoha načalnika Vaŭkavyskaha RAUS Vitala Kacuby ŭ 2004 hodzie.
Padpałkoŭnik milicyi Michaił Kazłoŭ, były kiraŭnik UBAZ pa Hrodzienskaj vobłaści, abvinavačvajecca ŭ tym, što viedaŭ pra płany padrychtoŭki terarystyčnaha akta, ale nie pryniaŭ mier pa jaho praduchileńni.
