Ketryn Eštan, fota AFP.
Jeŭrasajuz spadziajecca, što biełaruskija ŭłady prykładuć usie nieabchodnyja namahańni dla taho, kab miascovyja vybary 25 krasavika adkazvali mižnarodnym standartam i normam ABSIE. Pra heta havorycca ŭ zajavie viarchoŭnaha pradstaŭnika ES pa źniešnich suviaziach Ketryn Eštan ad 30 sakavika.
U zajavie havorycca, što apošnim časam u Biełarusi abmiažoŭvałasia svaboda schodu, asacyjacyi i vykazvańnia.
«ES hłyboka zaniepakojeny ŭciskam na pradstaŭnikoŭ niezaležnych ŚMI, hramadzianskaj supolnaści i apazicyjnych struktur u Biełarusi. Tak, niaŭradavyja arhanizacyi i apazicyjnyja partyi pa‑raniejšamu sustrakajucca ź ciažkaściami pry rehistracyi. Hetyja tendencyi vyklikajuć asablivuju zaniepakojenaść napiaredadni miascovych vybaraŭ. Dla ES vielmi važna, kab jany prajšli dobra», — adznačaje Eštan.
Viarchoŭny pradstaŭnik ES padkreślivaje, što abjadnanaja Jeŭropa budzie ŭvažliva sačyć za chodam vybarčaj kampanii ŭ Biełarusi.
Eštan taksama asudziła pryviadzieńnie ŭ vykanańnie śmiarotnaha prysuduu ŭ dačynieńni da dvuch biełarusaŭ u Minsku. Jana zaklikała biełaruskija ŭłady apublikavać poŭnuju infarmacyju pra heta, a taksama ŭvieści maratoryj na vyšejšuju mieru pakarańnia.
Pry hetym jeŭrapiejski čynoŭnik paćvierdziła hatoŭnaść ES supracoŭničać ź Biełaruśsiu, u pryvatnaści, u ramkach palityki «Uschodniaha partniorstva». Pavodle jaje słoŭ,
pašyreńnie ŭzajemadziejańnia zaležyć ad «kankretnych zachadaŭ Biełarusi ŭ kirunku demakratyi, pravoŭ čałavieka i viaršenstva zakona».
Jak paviedamlałasia, u niadaŭnim adkrytym liście da ŚMI pasoł Biełarusi ŭ Bielhii Uładzimir Siańko adznačyŭ, što ŭ «Biełarusi i ES vysokija čakańni ad dvuchbakovych adnosin». «Nie ŭsim zadavolenyja našy partniory ŭ Brusieli, ale, što važna padkreślić, i asnoŭnyja čakańni Biełarusi nie zusim zadavolenyja Jeŭrasajuzam», — zaŭvažyŭ Siańko.
Pavodle jaho mierkavańnia, «padobnaja situacyja charakternaja amal dla ŭsich halin supracoŭnictva — ad palityki i ekanomiki da kantaktaŭ pamiž ludźmi». «My ŭsio jašče raźličvajem na adčuvalnyja vyniki», — padkreślivałasia ŭ liście.
Biełaruski pasoł źviarnuŭ uvahu na toje, što Minsk «pahadziŭsia pačać ź ES dyjałoh pa pravach čałavieka, niahledziačy na toje, što ES pakul nie vykanaŭ adnu z umoŭ hetaha dyjałohu — płan dziejańnia dla raźvićcia dvuchbakovych adnosin».
