Łukašenka padčas znachodžańnia ŭ Vieniesuele, daylife.com
Alaksandr Łukašenka nazvaŭ paradaksalnaj situacyju, jakaja składvajecca ŭ adnosinach z uradam Rasii, i abvinavaciŭ rasijski kabiniet ministraŭ u vyrašeńni prablem ź Biełaruśsiu z pazicyi subjektyŭnaha charaktaru.
Na naradzie pa vynikach svajho vizitu ŭ Vieniesuełu i Braziliju Łukašenka padkreśliŭ, što «nie treba ŭ vystupie i zajavie kazać pra rasijski narod, pra Rasiju». «Rasija zanadta raznarodnaja, i toj, chto kinie kamień u rasijskaha čałavieka, budzie niačesnym čałaviekam», — skazaŭ Łukašenka. «Inšaja sprava, siońnia taja pazicyja, jakuju zajmaje rasijski ŭrad», — dadaŭ jon.
Łukašenka adznačyŭ, što ciapier pry zhadvańni ŭrada pačnucca razmovy: «Maŭlaŭ, Łukašenka nakaciŭ na Pucina».
«Pry čym tut nakaciŭ na Pucina? My bačym, kolki prablem siońnia nie vyrašajecca abo vyrašajecca z pazicyi subjektyŭnaha charaktaru z boku ŭrada Rasii», — skazaŭ jon.
My ni na kaho nie nakatvajem, my prosta pačynajem šukać inšyja nišy i krainy, dzie nas ŭsprymajuć i razumiejuć», — rastłumačyŭ Łukašenka, adznačyŭšy, što kroki biełaruskaha ŭrada pa pašyreńni supracoŭnictva supravadžajucca sarkastyčnymi kamientarami z rasijskaha boku.
«Mienavita tamu siońnia, jak nikoli, my vymušanyja aktyŭna pracavać u lubym, navat samym addalenym kutku śvietu, dzie my možam raźličvać na pradkazalnyja i sumlennyja ŭmovy ŭzajemavyhadnych handlova‑ekanamičnych suviaziaŭ», — skazaŭ jon. «Na Rasii i Jeŭropie śviet klinam nie syšoŭsia, treba vychodzić u inšyja rehijony sa svajoj pradukcyjaj i prajektami», — skazaŭ kiraŭnik dziaržavy.
