Z‑za ŭčarašniaha pažaru na kambinavanaj ustanoŭcy pa pierapracoŭcy mazutu na Mazyrskim NPZ spynieny technałahičny praces. Jak paviedamiŭ pres‑sakratar Homielskaha abłasnoha ŭpraŭleńnia MNS Rusłan Habryloŭ, praces spynieny da zaviaršeńnia adnaŭlenčych rabot.
Sihnalizacyja na pradpryjemstvie spracavała 30 sakavika ŭ 13.53 — na ŭstanoŭcy pa pierapracoŭcy mazutu adbyłosia vyciakańnie hudronu, jaki prajšoŭ termičnuju apracoŭku. U 14.02 u vyniku ŭzajemadziejańnia z kisłarodam pavietra i traplańnia na haračyja častki ustanoŭki adbyłosia ŭzharańnie vychadnoj paravadkasnaj frakcyi.
Jašče da pryjezdu padraździaleńniaŭ MNS byli evakujavany dva rabotniki, jakija atrymali termičnyja apioki druhoj i treciaj stupieni. Paciarpieŭ 34‑hadovy mantažnik — jon atrymaŭ apioki 13% cieła ŭ vobłaści tvaru, ruk, hrudziej.
Zaraz jon znachodzicca ŭ reanimacyi ŭ ciažkim stanie.
Druhi paciarpieły — 33‑hadovy miechanik technałahičnych pompaŭ, atrymaŭ apioki 9% cieła ŭ vobłaści tvaru, hrudziej, ruk.
Pryčynaj vychadu paravadkasnaj frakcyi hudronu stała razhiermietyzacyja zapornaj armatury. Tempieratura frakcyi — 340‑350°S, cisk — 2,5 atmaśfiery. Vychad paravadkasnaj frakcyi adbyŭsia ŭ momant zakryćcia zasaŭki pry praviadzieńni ačyščalnych rabot.
Z ulikam vybuchovaniebiaśpiečnaści abjekta na miesca NZ vyjazdžała bolš za 20 adzinak techniki pa piatym vykliku składanaści. Pažar byŭ likvidavany za 45 chvilin, dalej vialisia adnaŭlenčyja raboty.
