Jak paviedamiła 30 sakavika na pres‑kanfierencyi ŭ Minsku namieśnik staršyni hramadskaha abjadnańnia «Respublikanski turyscka‑spartyŭny sajuz» Valancina Maksimienka, u 2009 hodzie ŭ arhanizavanyja pachody adpravilisia 354 turystyčnyja hrupy, abo prykładna 3.200 čałaviek.
U 2008 hodzie ŭ pachodach pabyvali 256 turystyčnych hrup (2.300 čałaviek). Jak padkreśliła Maksimienka, usie hetyja hrupy aficyjna zajavili pra siabie ŭ Respublikanski turyscka‑spartyŭny sajuz i prajšli maršrutna‑kvalifikacyjnyja kamisii, jakija aceńvajuć adpaviednaść padrychtoŭki ŭdzielnikaŭ pachodu ciažkaści ich maršrutu, dajuć rekamiendacyi pa amunicyi i inš. «Na žal, vielmi šmat turystyčnych hrup chodziać u pachody, nie zajaŭlajučy pra siabie, jany nie prachodziać kamisii, nie stanoviacca na ŭlik, i my pra ich ničoha nie viedajem», — zaznačyła śpiecyjalist.
Pavodle jaje słoŭ, niahledziačy na rost tych, chto žadaje adpravicca ŭ pachod,
ich kolkaść značna mienšaja za tuju, što adznačałasia padčas piku raźvićcia spartyŭnaha turyzmu ŭ 1988 hodzie.
Tady ŭ pachody adpravilisia 1.790 turystyčnych hrup (bolš za 14 tys. čałaviek).
Asablivaj papularnaściu ŭžo doŭhija hady karystajucca pachody vychadnoha dnia, jakija nie patrabujuć śpiecyjalnaj padrychtoŭki. Astatnim pachodam prysvojvajecca katehoryja składanaści — ad pieršaj (samaj lohkaj) da šostaj (samaj składanaj). Pa Biełarusi ŭ asnoŭnym arhanizujucca pachody vychadnoha dnia i 1‑2‑j katehoryj składanaści.
Jak zaznačyŭ staršynia HA «Respublikanski turyscka‑spartyŭny sajuz» Mikałaj Dubovik, asnoŭnaja častka spartyŭnych pachodaŭ biełarusaŭ vykonvajecca pa terytoryi Rasii i inšych krain byłoha SND. Papularnaściu karystajucca Ałtaj, Kaŭkaz, Urał, Kolski paŭvostraŭ, Karelija, Karpaty, vodnyja maršruty ŭ Krymie. Viełasipiedysty časta padarožničajuć pa Jeŭropie, naviedvajučy Polšču, Čechiju, Słavakiju.
Siarod najbolš ekzatyčnych — pachody hrupy spraktykavanych turystaŭ pad kiraŭnictvam majstra sportu pa turyźmie, jakomu pryblizna 70 hadoŭ. Hrupa naviedała Kitaj, Iran, Pakistan, a sioleta maje namier adpravicca ŭ Tybiet.
