«Biełtelekam» abjaviŭ ab pačatku testava‑kamiercyjnaj ekspłuatacyi sietki biespravadnoha šyrokapałosnaha dostupu ŭ interniet WiMAX u Minsku. Na pieršym etapie sietka standartu IEEE 802.16e pabudavana na asnovie 22 bazavych stancyj kampanii Huawei, jakija pracujuć u dyjapazonie častaty 3,5 HHc.
Jak paviedamili ŭ hrupie pa infarmacyi i kamunikacyi «Biełtelekama», biespravadny šyrokapałosny dostup u interniet na bazie technałohii WiMAX budzie pradstaŭleny handlovaj markaj byfly. Abanientam (u pieršyja časy — fizičnym asobam) prapanavany taryfnyja płany byfly «Plus 1», «Plus 2», «Damasied Plus» i «Damasied XXL».
Dostup u interniet u sietcy WiMAX možna atrymać pry dapamozie USB‑mademaŭ kampanii Huawei.
Jany buduć vydavacca abanientam pry zaklučeńni dahavora na ŭvieś čas jaho dziejańnia. Dla klijentaŭ, jakija ŭpieršyniu stanuć vykarystoŭvać WiMAX, praduhledžany testavy pieryjad.
«Sietka WiMAX, pieršy frahmient jakoj zapuščany ŭ Minsku 31 sakavika, znachodzicca ŭ testava‑kamiercyjnaj ekspłuatacyi. Hałoŭnaja zadača zaraz — acanić jaje mahčymaści, zdolnaść vytrymlivać nahruzku i vyznačyć jaje aptymalnaje raźvićcio. Zrabić heta možna tolki razam z karystalnikami», — adznačyŭ namieśnik hienieralnaha dyrektara «Biełtelekama» pa kamiercyjnych pytańniach Andrej Saboraŭ.
Pakryćcio Minska sietkaj WiMAX zabiaśpiečvajecca 22 bazavymi stancyjami, radyus dziejańnia kožnaj ź jakich dasiahaje pryblizna kiłamietr. U zaležnaści ad ščylnaści zabudovy pakryćcio terytoryi radyjosihnałam moža zvužacca.
Namieśnik hienieralnaha dyrektara «Biełtelekam» pa techničnych pytańniach Siarhiej Sivadziedaŭ rastłumačyŭ, što kolkaść bazavych stancyj na pieršym etapie dazvalaje kropkava pakryć radyjosihnałam peŭnyja rajony horada, tamu pry pierachodzie z zony dziejańnia adnoj bazavaj stancyi ŭ zonu dziejańnia druhoj nieabchodna pierapadklučacca da sietki. «U dalejšym, kali zona pakryćcia budzie pašyracca, my pačniem realizavać «mabilny» patencyjał standarta WiMAX IEEE 802.16e. Da hetaha treba rychtavacca ŭžo ciapier, pryciahvajučy da testavańnia technałohii šyrokuju aŭdytoryju», — adznačyŭ Sivadziedaŭ.
***
Bazavyja stancyi raźmieščany pa adrasach:
• pr. Niezaležnaści, 117
• pr. Niezaležnaści, 169
• pr. Niezaležnaści, 99
• vuł. Zacharava, 55
• pr. Pieramožcaŭ, 21
• pr. Pieramožcaŭ, 61
• vuł. Hiebieleva, 7
• vuł. Hurskaha, 30
• vuł. Załataja horka, 5
• vuł. K. Libkniechta, 63
• vuł. Kulman, 27
• vuł. M. Bahdanoviča, 155
• vuł. Majakoŭskaha, 182
• vuł. Mielnikajcie, 7
• vuł. Panamarenka, 35a
• vuł. Sialickaha, 22
• vuł. Sialickaha, 82
• vuł. Ściebienieva, 10
• vuł. Cimirazieva, 9
• vuł. Ubareviča, 77
• vuł. Šaranhoviča, 19
• vuł. Jakuboŭskaha, 52
Zona pakryćcia adnoj stancyi składaje pryblizna ad 500 da 1000 mietraŭ.
***
WiMAX (anhł. Worldwide Interoperability for Microwave Access) — telekamunikacyjnaja technałohija, stvoranaja dla akazańnia abanientam pasłuh suviazi na vialikich adlehłaściach, u tym liku i šyrokapałosnaha biespravadnoha dostupu ŭ interniet. WiMAX dazvalaje padklučycca abanientam da sietki interniet na chutkaści da 15 Mbit/s u radyusie kiłamietra. Patencyjał technałohii dazvalaje stvarać biespravadnyja vysakachutkasnyja sietki ŭ maštabach haradoŭ, nie pryviazvajučy karystalnikaŭ da peŭnaha hieahrafičnaha punkta. WiMAX pracuje ŭ dyjapazonie radyjochvalaŭ ad 1,5 da 11 Hhc, u jakim realizavany standarty dla fiksavanaha (standart IEEE 802.16d) i mabilnaha (standart IEEE 802.16e) WiMAX.
