Da 100‑hodździa z dnia narodzinaŭ viadomaha navukoŭcy i dziejača biełaruskaj dyjaspary Barysa Kita kanał «Ład» płanuje pakazać telefilm «Zornaje pryciahnieńnie».
Staršynia arhkamiteta pa śviatkavańni 100‑hadovaha jubileju Barysa Kita piśmieńnik Vasil Jakavienka prapanavaŭ Nacyjanalnaj dziaržaŭnaj teleradyjokampanii da hetaj daty ŭklučyć u prahramu biełaruskich telekanałaŭ film «Zornaje pryciahnieńnie». Na svoj list Jakavienka atrymaŭ adkaz, u jakim paviedamlajecca, što
7 krasavika film miarkujecca pakazać na telekanale «Ład».
«Zornaje pryciahnieńnie» (režysior — Mikałaj Kniazieŭ, aŭtar scenaryja — Uładzimir Miechaŭ, apieratar — Vadzim Kupryjanaŭ) składajecca z čatyroch navieł pra «kaśmičnych» ludziej. Pieršaja častka znajomić hledačoŭ z historyjaj žyćcia ŭradženca Mahilova, viadomaha matematyka i astranoma Ota Šmita, jaki raspracavaŭ hipotezu ab stvareńni Soniečnaj sistemy ŭ vyniku kandensacyi kalasoniečnaha hazapyłavoha vobłaka. Druhaja častka raspaviadaje pra ŭradženca Hłybokaha (Viciebskaja vobłaść) — avijakanstruktara, stvaralnika samalotaŭ sieryi Su Paŭła Suchoha, treciaja — pra ŭradženca Słucka (Minskaja vobłaść), kanstruktara avijacyjnych i rakietnych ruchavikoŭ Siamiona Koźbierha.
Čaćviortaja navieła, pryśviečanaja Barysu Kitu, zdymałasia ŭ Frankfurcie‑na‑Majnie (Hiermanija), kali hieroju stužki było 97 hadoŭ.
Nahadajem, 100‑hadovy jubilej Barysa Kita adznačajecca 6 krasavika. U hety dzień u minskim Pałacy mastactva MHA «ZBS «Baćkaŭščyna» zapłanavała śviatočnuju viečarynu (pačatak u 17.00), padčas jakoj budzie dziejničać vystava knih i dakumientaŭ, pryśviečanych słavutamu dziejaču biełaruskaha nacyjanalnaha adradžeńnia. Na mierapryjemstva buduć zaprošany pradstaŭniki ajčynnaj navuki i kultury, biełaruskich uładaŭ, dypłamaty.