Biełteleradyjokampanija chadajničała ab daterminovym vyzvaleńni eks‑kiraŭnika BT Jahora Rybakova. Pra heta na pres‑kanfierencyi 31 sakavika ŭ Minsku paviedamiŭ staršynia Biełteleradyjokampanii Alaksandr Zimoŭski.
Pavodle jaho słoŭ, nakiravanaje kala troch tydniaŭ tamu chadajnictva ab vyzvaleńni Rybakova stała adnym z faktaraŭ, što paŭpłyvali na jaho daterminova‑ŭmoŭnaje vyzvaleńnie.
Havoračy ab matyvach hetaha chadajnictva, Zimoŭski paviedamiŭ, što «zapazyčanaść, jakaja ŭtvaryłasia ŭ Rybakova pierad Biełteleradyjokampanijaj pa rašeńni suda, budzie chutčej kampiensavana, kali jon budzie pracavać nie ŭ kałonii».
«My matyvavali svoj zvarot u tym liku i tym, što ŭ Rybakova budzie mahčymaść chutčej raźličycca», — skazaŭ Zimoŭski.
Adkazvajučy na pytańnie ab mahčymaści pracaŭładkavańnia Rybakova, Zimoŭski zaŭvažyŭ, što «kali jon asudžany z panižeńniem u pravach, to jon nie zmoža zajmać kirujučyja pasady, prynamsi, u Biełteleradyjokampanii». «Ale reparcior jon dobry», — dadaŭ kiraŭnik BT. Akramia hetaha, jon paviedamiŭ, što zapazyčanaść Rybakova pierad Biełteleradyjokampanijaj častkova pahašana. Pavodle słoŭ Zimoŭskaha, jon pakul nie sustrakaŭsia z Rybakovym.
Były staršynia Biełteleradyjokampanii Jahor Rybakoŭ 11 lutaha 2005 hoda byŭ pryhavorany da 11 hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Takoje rašeńnie pryniaŭ Viarchoŭny sud Biełarusi. Rybakoŭ byŭ pryznany vinavatym u atrymańni chabaru ŭ asabliva bujnym pamiery, zamachu na atrymańnie chabaru, kradziažy z vykarystańniem słužbovaha stanovišča i arhanizacyi kanałaŭ pa admyvańni i lehalizacyi niezakonna nabytaha abstalavańnia. Rybakovu było prapanavana dobraachvotna viarnuć teleradyjokampanii 212 miljonaŭ rubloŭ — sumu naniesienaha ŭronu.
