1 krasavika spoŭniłasia 70 hadoŭ hrafiku Uładzimiru Basałyhu (1.04.1940, Słuck Minskaj vobłaści).
Pieršy namieśnik staršyni Biełaruskaha sajuza mastakoŭ (BSM) Ryhor Sitnica adznačyŭ, što dla jaho Basałyha źjaŭlajecca prykładam słužeńnia nacyjanalnamu mastactvu. Jaho imia znachodzicca ŭ šerahu imionaŭ takich słavutych dziejačaŭ ajčynnaha vyjaŭlenčaha mastactva, jak Lavon Barazna, Jaŭhien Kulik, Alaksiej Maračkin, Vasil Šaranhovič i Michaś Basałyha. «Mienavita hetyja ludzi pačynali nacyjanalnuju adradženskuju tematyku ŭ biełaruskim mastactvie», — padkreśliŭ Sitnica. Pavodle jaho słoŭ, paśla da hetaj kahorty mastakoŭ-adradžencaŭ dałučylisia Mikoła Kupava, Uładzimir Savič i Michaś Ramaniuk. «Na ich dośviedzie našamu pakaleńniu mastakoŭ było značna praściej dałučacca da adradženskaha pracesu», — skazaŭ Sitnica.
Hrafičnuju sieryju Basałyhi «Pomniki dojlidstva Biełarusi» namieśnik staršyni BSM nazvaŭ «vielizarnym» ŭnioskam u nacyjanalnaje vyjaŭlenčaje mastactva. «Hetyja tvory z vysokimi mastackimi vartaściami ŭpieršyniu dazvolili mnohim biełarusam šyroka paznajomicca z ajčynnaj architekturnaj spadčynaj», — adznačyŭ Sitnica.
Uładzimir Basałyha paviedamiŭ, što zaraz pracuje nad hrafičnaj historyka-architekturnaj sieryjaj, u jakoj buduć adlustravany pomniki ajčynnaha dojlidstva — achviary duchoŭnaha Čarnobyla. Pavodle jaho słoŭ, havorka idzie pra architekturnuju spadčynu, jakaja zahinuła ad vojnaŭ, niedahladu, a taksama ŭ pieryjad savieckaha vajaŭničaha ateizmu.
«Tolki na terytoryi Słuckaha rajona Minskaj vobłaści da našych časoŭ nie dajšli kala 30 cerkvaŭ i kaściołaŭ. I ja chaču adnavić ich vyhlad», — skazaŭ Basałyha.
Pavodle jaho słoŭ, zrabić heta ciažka, tamu što pra hetyja chramy nie zachavalisia vyjaŭlenčyja materyjały. «Tak, z zahinułaj kultavaj spadčyny Słuččyny da nas dajšli tolki čarciažy i drennyja fotazdymki piaci cerkvaŭ i adnaho kaścioła. Vyhlad astatnich chramaŭ daviadziecca ŭznaŭlać pa ścipłych piśmovych źviestkach kštałtu taho, što «na zamčyščy stajaŭ sabor a piaci hłavach», — adznačyŭ mastak.
Vystavu svaich tvoraŭ jon płanuje pravieści ŭ Minsku pry kancy hetaha hoda.
