Jan Pavał Druhi i trochhadovaja Monik padčas naviedvańnia Mazambika ŭ 1989 h., Reuters.
Katalicki śviet pryhadvaje siońnia vialikaha pantyfika Jana Paŭła Druhoha. Prajšło 5 hadoŭ, jak pamior vydatny teołah, humanist, pieršy siarod słavian papa rymski.
Jaho vobraz dahetul žyvy ŭ sercach mnohich ludziej. U luby dzień na płoščy śviatoha Piatra ŭ Rymie tysiačy pałomnikaŭ stajać u daŭžeznaj čarzie, kab na niekalki siekundaŭ padyści da mahiły Jana Paŭła Druhoha.
Staryja i maładyja ludzi roznych nacyjanalnaściaŭ, vieravyznańniaŭ i prychilnaściaŭ bieśpierapynna iduć da jaho. Čamu?
Kardynał Andžeła Kastamary ličyć, što fihura Najśviaciejšaha ajca Jana Paŭła Druhoha stała dla čałaviectva ŭzoram paŭnavartasnaha žyćcia, pražytaha dziela ahulnaha dabra:
«Jan Pavał Druhi dakładna ŭśviedamlaŭ, čamu jon žyŭ i dla kaho jon žyŭ. Vierny svajmu ideału, jon niaŭchilna vyznavaŭ abrany ład žyćcia. Heta čałaviek, jaki całkam pryśviačaŭ siabie abranamu ideału Isusa Chrysta. Tamu ŭspamin pra takuju mocnuju asobu, jakoj byŭ Jan Pavał Druhi, na siońniašni dzień vyklikaje ŭražańnie, bo takija ludzi sustrakajucca redka».
263‑ci biskup Ryma kiravaŭ Katalickim kaściołam 26 hadoŭ. Jon naviedaŭ bolš za 130 krain, ździejśniŭšy 100 padarožžaŭ pa śviecie. Na aŭdyjencyi ŭ papy Karala Vajtyły pabyvali prykładna 18 miljonaŭ chryścijanaŭ i pradstaŭnikoŭ inšych cerkvaŭ. A raźvitvacca ź im prybyli ŭ Vatykan 5 miljonaŭ viernikaŭ.
Łozunham pantyfikata Jana Paŭła Druhoha byli słovy: «Nie bojciesia! Adčynicie dźviery Chrystu!» Usio svajo žyćcio pantyfik śmieła i nastojliva paŭtaraŭ hety deviz.
Zaklik hučna łunaŭ u śviecie, jaki časta zdavaŭsia usonienym, abyjakavym da viery, adnak Papa niastomna išoŭ svaim šlacham.
A tam, dzie jon byvaŭ, źmianiałasia śviadomaść i śviet mianiaŭsia da lepšaha.
Pantyfik polskaha pachodžańnia z krainy kamunistyčnaha režymu paskoryŭ raspad Savieckaha Sajuzu i vyzvaleńnie krain Uschodniaj Eŭropy. Jan Pavał Druhi refarmavaŭ katalicki kaścioł. Pad jaho kiraŭnictvam Vatykan ustanaviŭ dypłamatyčnyja suviazi z mnohimi (bolš jak sotniaj) dziaržavami, u tym liku ź Biełaruśsiu.
