Na zdymku: honščyk Tom Čyłtan, jaki ŭstalavaŭ takoje škło na svaju mašynu dla spabornictvaŭ.
Brytanskija raspracoŭščyki prapanujuć zamiest akularaŭ i kantaktnych linz ustaloŭvać admysłovaje vietravoje škło, jakoje vykonvaje tyja samyja funkcyi.
Šmat chto z nas maje tyja, ci inšyja zrokavyja niedachopy. Šmat chto z nas kiruje aŭtamabilam. I nasić za styrnom akulary i linzy nie toje što zručna, a prosta abaviazkova pa zakonie!
Ale pryznajciesia, kožnamu z nas moža trapicca zabyć akulary doma. Zastrachavacca ad padobnaj niedarečnaści i zabyć pra «akularavyja prablemy» prapanuje firma Auto Windscreens z anhlijskaha Česterfiłda.
Kampanija pilna daśledavała asablivaści izhibaŭ i aptyčnyja ŭłaścivaści karehujučych akularaŭ ad blizarukaści. Vynikam stała vynachodnictva, što i vietravomu škłu možna zadać padobnuju kryviznu. Takim čynam mahčyma indyvidualna pad kožnaha vyrabić vietravoje škło zhodna ź jaho aftalmałahičnym receptam.
Brytanskaje ahienctva YouGov pravodziła daśledvańnie, u jakim pałova apytanych skazali, što musiać karystacca akularami ci kantaktnymi linzami, kab kiravać mašynaj. Z hetaj pałovy piataj častka pryznałasia, što im zdarałasia sadzicca za styrno biez aftalmałahičnych pryładaŭ. A kožny treci z usich apytanych navat nie viedaŭ, što kiravać «uślapuju» — parušeńnie zakonu!
«Aŭtamabili z novym škłom nie tolki abaroniać biaśpieku i lehalnaść «akularanoscaŭ» na darohach, ale i patencyjna mohuć pryvieści da skaračeńnia kolkaści kradziažoŭ mašyn. My čakajem, što raspracoŭka dabjecca pośpiechu, i zaraz pracujem nad bifakalnym vietravym škłom», — raspaviadaje Najdžeł Devis, dyrektar kampanii pa prodažach i markietynhu.
U kamplekcie z škłom ad kampanii Auto Windscreens idzie admysłovy nabor dla čystki — ščotka i vieličeznaja survietka.
