Ministr unutranych spraŭ Biełarusi Anatol Kulašoŭ zajaŭlaje, što zabojstvy ŭ Mahilovie dźviuch žančyn z rasčlanieńniem ich ciełaŭ učynienyja, chutčej za ŭsio, na bytavoj hlebie.
Pra heta paviedamlajuć aficyjnyja krynicy. Pavodle ministra, niama abjektyŭnych źviestak pra toje, što złačynstvy ŭčynienyja sieryjnym zabojcam ci mańjakam.
«Zabojstvy nasili situacyjny charaktar. Abo skandał, albo pjanstva, albo vyśviatleńnie adnosinaŭ na bytavoj hlebie. Ciapier pravodzicca kompleks apieratyŭna‑vyšukovych i śledčych mierapryjemstvaŭ. Pavodle źviestak na druhoje krasavika, zabityja žančyny ŭstanoŭlenyja», — cytujuć Anatola Kulašova aficyjnyja krynicy.
Na pieršaje rasčlanionaje, abiezhałoŭlenaje, biez ruk i hałavy cieła, zahornutaje ŭ praścinu, ludzi natknulisia kala mosta praz Dniapro, niepadalok ad mahiloŭskaj vulicy Facina, 23 sakavika. Paźniej sałdaty znajšli astatnija častki cieła. Śledčyja ŭstanavili, što zabili žančynu 1975 hoda naradžeńnia.
Druhoje rasčlanionaje žanočaje cieła znajšła žycharka vulicy Facina la doma № 6. Jano taksama było zahornutaje ŭ praścinu.
Pa faktach znojdzienych ciełaŭ abłasnaja prakuratura raspačała kryminalnyja spravy, abjadnanyja ŭ adnu vytvorčaść.Pavodle adnoj ź viersijaŭ, zabić žančyn moh čałaviek ź psichičnymi adchileńniami. Abodva zabojstvy, śćviardžaje staršy namieśnik prakurora vobłaści Ała Kuźniacova, byli ŭčynienyja ŭ adzin i toj ža dzień i pryblizna ŭ adnym i tym ža miescy.
